維園年宵$35試食 髮菜蠔豉雞蛋仔

三星級米芝蓮名廚、「廚魔」梁經倫連續第三年同ClubONE殺入維園最大年宵檔。黛安噚日去咗何文田ClubONE率先試食。今年廚魔繼續發揮創意本色，話要為港產小食注入新元素。黛安話最特別一道菜，肯定要數由髮菜、蠔豉製成嘅港式雞蛋仔。你無聽錯！呢味寓意發財好市嘅賀年菜，混入雞蛋仔會變成乜嘢味？根據黛安嘅試食後感係入口鹹鹹地，中間有一絲絲髮菜，仲咬到粒粒蠔豉肉，又幾夾喎！真係估你唔到！

每日限量數百份

但黛安始終鍾情甜食，廚魔另一新作、加入檸檬及提子乾炮製嘅「托尼雞蛋仔」就啱晒。據講靈感源自意大利賀年甜點Panettone。廚魔仲即席用老友廖碧兒親自釀嘅紅酒，煮出紅酒雲呢拿朱古力汁，灑在雞蛋仔上，咬落酸酸甜甜，食到停唔到口。

黛安聽ClubONE董事總經理黃復華及集團總經理蘇玉屏講，由於雞蛋仔即叫即整，製作需時，所以每日限量數百份，每份賣35蚊。此外佢哋又會提供長者半價及情侶買一送一優惠，希望吸引多啲人幫襯。