黃士心抱孫 提議取名「光泰」

噚日去康泰攞旅行資料，遇上笑容滿面的「旅遊教父」黃士心。梗係啦，佢早幾個月獲頒大馬拿督，阿囝黃進達（Jason）剛當上旅遊業議會主席，最近又抱孫（Jason兒子），咁多開心事，心情梗靚。

黛安問黃老闆孫仔改咗名未？佢話未，但自己心中有個提議，希望取名「光泰」。佢話根據族譜，乖孫屬於「光」字輩，而「光泰」則係爺爺對乖孫嘅心願，希望下一代能夠將康泰發揚光大咁話。不過Jason就話個名仲未confirm，唔知最終會否採納爸爸的建議呢？

提到Jason做旅議會主席，佢直言好高興，又講笑話：「（我）做唔到，起碼都做到主席老竇！」臨走黃老闆仲送咗佢新出的《京阪神玩番天》簽名書畀黛安，搞到我都心思思想去日本旅行。