柏靈頓熊慈善跑 遊走大埔地標

柏靈頓寶寶熊係經典文學角色，故事中熊仔雖然經常「撞板」，但仍認真努力想做對每件事，令黛安聯想到唔少特殊學習需要（SEN）嘅同學仔，都好努力咁想挑戰自己能力。大埔超級城與大埔浸信會社會服務處合作，明年元旦舉行首屆「柏靈頓寶寶熊新年愛心慈善跑」，除遊走大埔著名地標，更有「體驗小任務」。比賽設公開組和親子組，分別最少捐款200元及100元便可參加，既可親子一番，又幫到SEN同學籌款，真係一舉兩得！

黛安仲聽到黃先生分享，15歲患有自閉症嘅囝囝有時會喺街上大喊大叫，更有自殘傾向，承受巨大心理壓力。而商場上月訪問逾500名小學生同家長，發現7成有SEN子女家長認為溫習默書、測驗和考試令佢哋倍感壓力，雖然被訪學生中近半願意接納或陪伴保護SEN同學，但當有人排擠、取笑、欺凌時，4成人竟選擇「走開，唔關自己事」。大埔浸信會社會服務處總經理鄭繼池希望配合學校嘅關愛文化，可以提升同學嘅道德勇氣。