盛智文玩鬼屋喊驚 劉鳴煒扮捉鬼敢死隊

海洋公園哈囉喂全日祭又嚟喇！今年除咗有亞洲人氣偶像唐禹哲化身殭屍王吸睛，仲加入「本地薑」邵音音同秦煌同「鬼后」羅蘭姐齊齊捉鬼；海洋公園副主席劉鳴煒亦化身「捉鬼敢死隊」成員，chok住同一班嘩鬼同場較量。最難得係前主席盛智文都特登返海洋公園撑場造勢，雖然今次佢無扮鬼扮馬，但就有試玩鬼屋，仲話好恐怖、好刺激，叫大家一定要來玩呀！

黛安昨率先試玩咗今年主打血腥、恐怖的「16禁」。入場前玩家需要帶上面具，入場後聽到一陣陣淒厲叫聲，一幕幕血淋淋的人體實驗情節亦隨即呈現眼前，真係少啲心血都唔得，唔怪得16歲以下唔入得。

「16禁」血腥恐怖

仲有變身鬼屋「照妖宮殿」，一入場就見到唔少以《西遊記》角色為主的妖精，建議追求刺激的朋友可以當係「熱身」。

遊客亦可預先下載主打AR技術的「猛鬼獵人App」，邊捉妖邊selfie，聽講仲會有特定禮物！溫馨提示，AR程式都幾食電㗎，想玩得盡興記住帶埋叉電器入場！