《荒唐阿姨》玩死姬摩絲

「雞蛋六隻，糖呢就兩茶匙……」電視劇集有好多種，不要以為英國BBC，只賣男神《新福爾摩斯》，其實當年還有《荒唐阿姨》，到底你又知唔知？

《荒唐阿姨》英文名叫Absolutely Fabulous，我喜歡直譯：絕對正斗！劇集早於1992年推出，斷斷續續共拍了四、五季，每次都見好就收，從沒想過來到2016年會出現電影版，更有幸在本港上映，因我懷疑香港的忠粉有多少。

從電視機走進大銀幕，情懷不變，笑料依然。兩位甜姨姨女主角「防腐」登場，甫開場已自嘲出街前要花時間執樣「大修」，實在歲月不饒人。今次「孖姨」繼續夜蒲，稍不為意玩死超模姬摩絲，惹來全城通緝，結果她們要避走法國。

如果觀眾覺得《靚太唔易做》輕鬆好笑，《荒唐阿姨》就更啜核過癮。值得欣賞的，還有故事着墨於家庭溫馨，母親愈是糊塗，為人子女就愈要精明，因為餐餐搞出大頭佛，總要有人懂得如何收科。傻大媽開心又過一天，面對正經嚴肅的女兒，那種衝突矛盾格外相映成趣。