回顧退役747客機 空姐難忘接待國王

搭飛機依家唔係乜稀罕事，但30幾年前就唔同講法，全靠波音發明咗載客量超高的747客機，去旅行先變得easy又便宜。但再好的飛機都有退役一日，國泰就宣布咗機隊裏面的747客機下月1號由東京返港後，就會退役，結束37年漫長旅程；國泰仲預留咗機位畀同事申請，齊齊同747送別「say goodbye」。

未夠廿歲就加入國泰的航空機艙服務標準及安全經理LELE就話好唔捨得，「當年一過試用期就飛747，好威㗎。」佢仲話747夠大有埋床畀空姐休息，返工奉旨瞓覺，感覺好新鮮；而且逢聖誕地勤仲布置埋機艙，好鬼開心。

佢仲話，喺747服侍過唔少名人，除咗台灣歌星張惠妹，仲有馬來西亞國王，「國王份人好nice，要求同一般頭等客無乜分別。」但佢話因好多同事都想飛呢個退役之旅，所以佢今次就唔會陪747飛最後一程了。