楊大偉開素食café 最愛「海南雞飯」

早排見Green Monday創辦人楊大偉（David）喺facebook分享咗啲好吸引嘅食物相，於是打畀佢問下喺咪發掘到新嘅素食好去處，傾落先知，原來係Green Monday旗下專門推廣創新綠色飲食潮流嘅Green Common，最近喺尖沙咀海港城開咗分店，唔單止有綠色食品，仲加入咗自家Café元素，用嶄新食物科技「Food 2.0」食材入饌，品嘗美食之餘又幫到環保。

David仲私人推介咗佢嘅最愛「海南米走雞」，叫黛安一定要去試下，主廚用咗5種不同「素」材炮製，上層以脆薄腐皮配搭粉皮，中間抹上沙茶醬，做出透薄「雞」皮；中層以傳統素雞加上Beyond Meat植物雞肉，呈現出兩種唔同質感；底層就配搭同素雞肉一齊煮過嘅秀珍菇，吸收味道精華，仲滲出淡淡嘅南薑同香茅香，每日賣30份咋。

手製曲奇 撑本地婦女

呢間Green Common新店比鄰海運大廈海旁地下入口，面積過千呎，可以容納共50人，Café仲有植物奶咖啡同埋純素甜品，除咗純素食者，乳糖不耐症人士、或者其他關注健康嘅人都可以無顧慮開懷品嘗。就到聖誕，Café仲會推出埋素食聖誕套餐，既有型又有營。

講到禮物，David仲推薦咗Green Common首次推出嘅聖誕手工曲奇禮盒用嚟送禮，內有5款自家手工雜錦曲奇，包括杏仁條、蝴蝶酥、薑餅人、榛子曲奇同埋紅莓燕麥曲奇，由本地婦女手工製作，既不含反式脂肪，亦無膨脹劑、色素、香料及防腐劑㗎！