馮強參觀「雋悅」 遇40年前對手

黛安噚日同爹哋、媽咪去咗房協北角長者屋「雋悅」參觀。佢哋話自己年紀愈來愈大，唔想將來有咩居家安老問題要黛安擔心，所以上去了解下。一上到去，就撞到馮強同幾位傳媒行家，原來佢哋應房協物業發展及市場事務總監劉竟成（Daniel）邀請去參觀。聽Daniel講起，佢同馮強係大學同學，40年前仲一齊爭過船王董浩雲（即前特首董建華嘅爸爸）獎學金，最後馮強贏咗，獲資助上「海上學府」郵輪到唔同國家旅遊交流。同行嘅「大姐」蔣芸聽完後講笑：「爭過女朋友就話啫？爭過同一個獎學金都記得？」大家都哈哈大笑。

講番雋悅，Daniel話現時出租率逾六成，800幾呎同千呎單位統統租出，依家入住的話，最大只能租用700幾呎嘅單位，可見呢幾幢以「頤養天年安枕無憂」為目標嘅長者屋幾受歡迎。單位內除咗有幾個緊急支援位置，黛安最有印象係屋內嘅「靜態探測系統」（入住長者有要求時才裝置），一旦發現長者8個鐘頭在家居內無動靜，大廈管理便會上門探訪，了解有無意外發生。

黛安嘅爸爸最鍾意屋苑會所嘅恒溫泳池；加上大廈位置好，行幾分鐘就到北角港鐵站，用兩蚊就可搭車搵黛安食飯，真係唔錯！