晴報VIP｜攀山強人吳俊霆為事業 35歲前住冇窗劏房 時代變不埋怨「開心嘅人最厲害！」

我的左膝及右臂關節長期疼痛，這些傷患後遺纏擾了我多年。在求醫的漫長路上，去年終於遇上是次的受訪者Elton吳俊霆。

{{hket:inline-image name="1.jpeg"}}{{/hket:inline-image}}

{{hket:inline-image name="IMG_9654.jpg"}}{{/hket:inline-image}}

我是Elton的真病人，他是減輕我痛楚的註冊物理治療師，同時亦是傑出義工獎得主、傑出理大校友，以及2018年十大傑青等等，他身份很多而最重要的一個 — 獎牌獎座數之不盡、戰績彪炳的越野賽運動員，他是最年輕完成攀登世界七大洲八大高峰的香港人，曾在2016年率領TVB藝員黃德斌、謝東閔和梁彥宗到尼泊爾挑戰世界第8高的馬納斯盧峰。

毅力鬥心成就今日

「攻頂強人」Elton的童年從未贏在起跑線，他往後的成就，全是毅力與鬥心的結果，「我唔敢講話細個特別窮，屋企屬於正常嘅貧苦大眾。我70年代出世，阿媽做工廠，阿爸為人好善良，好循規蹈矩，喺九巴做站長。我一出世就住元朗大坑渠側邊嘅木屋，喺臭河隔籬環境實在係差，我細個好孱弱，成日病，阿爸阿媽話我哋冇錢睇醫生，阿仔你唔好再病，如果大個讀到書就要做醫生，呢啲就係我嘅童年記憶。」

Elton形容兒時的自己很「鵪鶉」，連去荔園坐小電船都會感到害怕，「因為我冇見過世面，加上冇乜朋友。阿爸阿媽要返工，所以我幼稚園已經自己返學放學，7歲開始煮埋飯畀阿妹食。小學搬咗上公屋之後，我成日偷偷走上屋企後面個丫髻山，佢係我人生第一座行嘅山。上丫髻山睇日落、望住元朗嘅平原覺得好開心，我真係好鍾意山，一路以嚟都係我一個人上山活動，所以有啲孤僻。」

中學年代，他知道有愛丁堡獎勵計劃（DEA），於是秒速參加，正式學習何謂行山，「我讀中三已經學人搞咗個私人行山會，叫啲中學同學Join。嗰時冇網上資訊，都係買啲行山書返嚟跟。朱維德呀、陳溢晃呢啲旅遊家都寫好多行山書，但嗰個年代有字冇圖，睇完要斷估行，又冇Google Map，通常都會行到亂晒龍、好狼狽，既唔識得處理傷患，又盪失路咁，帶嘅隨行物品又唔啱，慢慢發覺唔可以亂嚟，不如正正式式學啦，除咗DEA之外，自己讀中學、讀大學時都有不斷睇書進修。」

{{hket:inline-image name="23.jpg"}}{{/hket:inline-image}}

當身邊每一個同學都在拍拖、花錢享受青春歲月的時候，Elton卻在努力讀書和行山。

「你嘅青少年時期好勵志。」我說。

「我啲舊同學話當年嘅我，係一個隱蔽青年。」他說。

「雖然大家嘅家庭背景差不多，但我都知道自己生活困乏一啲，我仲記得以前想買盒顏色都冇錢，要借同學嘅嚟用。以前學校有小賣部，我去到中學畢業都未幫襯過一次，因為屋企從來冇畀零用錢我，我中二開始出去做補習搵自己生活費，所以放學咪唔見咗人、唔會同啲Friend去玩囉！因為屋企環境唔好，200幾呎4個人住，所以我會考時搬咗去阿叔間吉屋住，中六之後直情搬咗出去住啲親戚朋友屋企。我自問係個好勤力嘅人，日日喺圖書館過，睇晒圖書館啲書，想學乜就睇乜。我形容自己嘅前半生可能係行山、睇書，然後四周圍去上堂學嘢，我連社交舞、觀星、烹飪都學晒，好搞笑。」

熱愛參加比賽：對自己專業嘅熱誠

父母曾希望Elton能成為醫生，為何他最終選讀理大的物理治療，並且去廣州學針灸？他說：「我中四去咗聯合醫院做義工、每個暑假都去做，朝8晚5返工咁返，做勻晒唔同部門，連臉房、藥劑、物理治療都做過。雖然我嘅成績夠讀醫，但發覺自己最鍾意都係物理治療，因為醫生診症同病人關係疏離啲，物理治療就會同個病人Close啲，了解多啲佢嘅生活背境、了解佢嘅人生故事，再去諗下有咩可以幫到佢。當初我以為我鍾意呢個工作，所以就去做呢個工作，然後發覺原來我一至日嘅生活都同物理治療有關。行山、爬山之外，仲有一樣嘢叫跑山，我會星期日去跑比賽，我一至六可能睇病人，而晚上就去做訓練，跟住半工讀讀埋個Master及其他相關課程。」

每次去到Elton的中心接受治療，路過健身室都會見到兩大個櫃，裡面是滿滿的獎盃和獎牌，數目之多令人咋舌。我每次都在想，到底一個怎樣的人才會一生不斷參加比賽？首先他不能有惰性，同時信念要超強。我問：「我覺得你唔係為咗每一次單一嘅比賽，而係將你人生中某段時間充斥住比賽。其實你Keep住自己做緊一件乜嘢事呢？」

「係對自己專業嘅一個熱誠。比賽只係一部份，我比完賽通常就會留低做大會嘅物理治療Support。所以我大學畢業之後5年，除咗勤力讀書、進修、訓練、比賽，再通過比賽做臨床傷患處理，然後發覺自己好鍾意呢個行業，所以不斷進修同物理治療有關嘅嘢，例如去廣州讀中醫學針灸，再去英國讀一啲我哋叫做『院前急救』嘅課程，係專門幫運動隊嘅，包括香港代表隊、幫國際欖球賽嘅世界代表隊咁，甚至相輔相成，跟過唔同嘅港隊或者世界代表隊出外，例如跟過澳洲隊去世界各地比賽。我細個好窮，冇機會去外國爬山，但我去外面比賽時，通常都會有休息時間，又或者臨返香港前一兩日，我就會去爬山。我老婆成日話同我去旅行，最緊要搵座山先。」

「你覺得你嘅1年，等於我哋幾多年呢？」我問。

「3年啦！」他說：「好誇張。」

「其實我瞓好少，我嘅深層睡眠可能比人多成倍，所以我成日講笑話自己瞓4個鐘，可以已經等於人哋瞓8個小時（笑）。當你做緊一啲好規律性嘅嘢，例如返工，去到夜晚潛意識會覺得瞓咗好浪費，我每晚起碼用一個鐘去汲收新知識，同埋學下點樣搞好啲間公司，點樣由現在中型，再搞好啲做大啲，睇下人哋運作大公司嘅策略。」

回望年輕時光 「捱苦」儲錢創業

Elton的毅力和行動力比一般人強，他坦言跟童年的朋友未必能交心，「我20歲時，同啲20歲嘅朋友一齊去比賽雖然開心，但一講到工作、講到自己追求嘅夢想時，就發覺大家嘅步伐唔同。嗰時我好鍾意同啲3、40歲嘅人一齊玩、一齊去旅行同比賽，聽佢哋講講人生經歷，覺得其實佢哋打好咗根基，處理問題時都好有方法。去到我3、40歲時，我就鍾意同啲5、60歲嘅前輩傾偈，發覺其實佢哋乜嘢苦都捱過晒，佢哋排除萬難先去到現在嘅階段，所以我幾特別嘅，我身邊有好多朋友，但大部分年紀都大過我。」

「捱」出來的他，對於「苦」有他的一種看法。

「我呢個年代出世嘅人著數啲，因為苦係物質嘅苦，你勤力就有回報，我哋個年代簡單啲，只要你勤力就贏人，當時我唔覺得苦，而家回望，原來自已都幾捱得嗰喎！我反而戥呢個年代嘅年輕人辛苦，首先社會資源分配唔平衡，有啲人起步點好低，好難追過人，第二係現在資訊爆炸，學嘢個個都學到㗎喇，你要突出重圍好難，而家要求擁有多元才能先至算係叻。」

為了盡快擁有自己的事業，Elton從18歲開始「納米生活」。為了省錢，大學年代他租天台屋住；成為了物理治療師之後，他搬到沒有窗的劏房，一住便住了7年，每日節衣縮食、儲夠120萬終於開了自己第一間診所，一直去到35歲才搬離幾十呎的納米天地，「做過好多次訪問我都冇講過，我人生儲夠錢買嘅第一層樓唔係買畀我自己，係買畀父母住，然後自己繼續捱住劏房先。到父母有咗好少少嘅生活嘞，最後自己結婚嘅時候，先至買樓自住。」

我問：「你嘅成長犧牲咗好多同朋友交往嘅時光，咁太太係咪你最好嘅朋友呢？」

他說：「一定係呀！年青時我都有拍下拖嘅，事實上我認識嘅前女朋友，同我都有啲似，都係出身貧窮、性格堅毅，佢哋而家都事業好好，有個好家庭、人生有抱負，都係對社會有責任有承擔嘅人，只係同我性格唔夾啫。遇到而家嘅太太真係好好，可能我對父母、對太太嘅時間較少，但是少唔代表冇質素。啲人成日話我又爬山、又比賽、又要處理事業、又要教書、又要做Research咁多嘢，一定冇時間理屋企，我就話呢個係最常見嘅謬誤，點解唔可以有一個平衡嘅人生呢！我自問對阿爸阿媽好好，佢哋都以我為榮、覺得我好錫佢哋，時間係少㗎喇，咁咪用最少嘅時間去做到最好嘅嘢囉。我同太太講，我從來唔會食要排隊嘅餐，我唔會做啲浪費時間嘅事。」

{{hket:inline-image name="J1-32.jpg"}}{{/hket:inline-image}}

醫療事業需注重服務質素細節

被問到怎樣能將專業變成事業，而事業既能幫助別人，又能夠變成一種成就時，Elton表示：「大家認為做親生意嘅人一定市儈、一定衰，首先唔係嘅，我自己都打過工。如果我係要發大達，一定唔係而家嘅做法，一定會再Chur啲、再Mean啲。我哋做得醫療嘅人，要維持生意健康，先可以將理念發揮得更長遠，要對個病人好，又要維持到Quality但唔好收咁貴，仲要與時並進，不斷思考新方向新技術去領導同業市場，其實好難，但我公司多年來一直能保持優勢同聲望，最主要係寧願花心血每個細節都注重Quality，唔係只為谷生意。」

疫情改變了全世界，對Elton的生意當然帶來過負面影響，「疫情後好多人嘅工作心態變咗，有啲人已經返慣Home Office，例如我有好多做銀行嘅朋友，佢哋好難再叫啲同事返公司工作。我哋嘅行業唔可以喺屋企做嘢，但呢個世界已經有Home Office、又可以Start up創業，或者可以搵一份喺屋企做嘅工、做Freelance、做個KOL搵錢等，好多近兩年大學畢業嘅人，其實嗰3、4年大學都冇乜正式面對面授課，我哋請新嘅物理治療師、請新嘅Rehab助手時，佢哋都唔知呢個行業嘅文化係點，亦未必體會到醫療人員嘅付出，或者應該點樣去關懷病人等等，加上有人做幾個月就要去放假、Working Holiday、移民咁，所以好難請人。」

45歲的Elton表示，自己的20歲是個開竅年代，很豐富、很勤力，努力到3、40歲發覺自己有了事業根基，便挑戰世界山峰；然後公司上了軌道、建立自己的家庭，一切看似很順利，但其實當中有很多問題，最大的衝擊是，就算拿了傑青、做了理大傑出校友、做了很多社會服務也好，但生意其實很難做，自己在疫情的3年間沒有比賽，身體真的變差了，再加上年紀大了，其實已回不到40歲的體能和水平。

攻克40高峰 談傳承精神

成功爬了40個國家及地區的最高峰，「攻頂強人」Elton未必再能登上第50個、60個國家的山頂，對此，他擁有以下這一種心態：「首先做人唔會一刻成功咗就完，你不斷有新嘅難關，就要不斷諗計去破解佢；第二，唔需勝過上一個Achievement，我舉個例子，我爬完珠峰，冇嘢再高得過珠峰㗎啦，我就算去爬第50或60個國家嘅山，都唔再係嗰個高度。傳承係另一個途徑，如果有一個年青人，我可以將自己嘅經驗濃縮咁話佢知，佢就唔使行冤枉路，如果佢有Talent，我唔介意傳承畀佢。」他說。

談到傳承，對於自己女兒的教育，他又有何計劃？

「我人生除咗要衝、除咗不斷要接受挑戰，另一步就要諗Equilibrium（平衡）。成功就係要Multi-tasking，呢個年代嘅人要乜都識。老實講，我身邊好多朋友，有啲好識得教小朋友，有啲唔識教。我身邊有個企業家，幾十億身家嘅，佢個女暑假去連鎖咖啡店打工，我覺得呢個經驗好好。如果你問我，我都會畀我個女學運動，好似我同太太咁強身健體，希望佢有一個正面嘅人生目標，唔好追打機，或者追網上Follower多，我寧願佢鍾意同人鬥跑得快、游水游得快，贏輸冇所謂。我而家有帶個女去做社會服務㗎，送禮物畀老人院嘅公公婆婆、同佢哋唱歌做運動咁，雖然阿女唔知發生乜嘢事，但希望佢有一個平衡嘅人生，將來多做社會事務，勤力讀書、做好運動，我諗我同太太會畀到一個比較正常、優質嘅生活佢。」

{{hket:inline-image name="J1-3.jpg"}}{{/hket:inline-image}}

心態改變命運 迎合時代變遷

一直和Elton談過去，說現在，發現堅毅的他，是個捱過苦而不覺得苦的人，說到尾就是心態改變命運的好例子。他為自覺過著「苦日子」的讀者們打打氣：「以前啲前輩成日講做人要有世界觀，唔好只係用自己嗰套去諗，我阿爸都成日都話要逆地而處，舉個例，成日聽到人講某啲國家有幾好、某啲政策有幾好，我每次去旅行都鍾意同當地人傾偈，我話：『新聞話你個國家咁咁咁喎，你點睇呢？』然後，你會聽到另一啲聲音，發現世界上冇嘢係最完美嘅，自己一定唔係最差、唔係最痛苦嗰個。15年前冇Google Map、20年前都未有咁多功能嘅手機啦，我哋改變唔到個時代，個時代只會不斷變，過多1年，你會發覺全世界都用ChatGPT做嘢㗎喇。與其埋怨，不如諗方法去迎合佢啦！再勁啲嘅人會去改變佢，我做唔到，就只可以迎合。」

此外，Elton還有以下的忠告給你和我：

「人生去到最後會點？其實每個人都要面對生老病死，好多人生活得唔開心，但點解有例外？其實最厲害嘅人就係開心嘅人。乜嘢係最開心？成功嘅人唔一定開心，因為佢都唔係做緊自己鍾意嘅嘢，有人已經賺到4億，但隔籬啲Friend個個10億身家，所以佢唔開心，再要追！請先問番自己個初心係乜，嗱，我自己個初心好簡單嘅啫，我係一個運動狂熱，就算我而家未必再爬得到好多世界高峰，你見我大前年都追咗一個目標，就係3日爬晒香港100座山，我相信呢一刻我嘅體能再做唔到，我咪再設定一個難度畀自己，少少Overload但我又能夠達到嘅囉！」

{{hket:inline-image name="J1-34.jpg"}}{{/hket:inline-image}}

撰文：陳小芝

編輯：陳潔雯

攝影：陳健珊

{{hket:inline-image name="vip1.jpeg"}}{{/hket:inline-image}}