叠影狙擊丨郭政鴻慶幸功夫底成御用反派 不反對兩女入行：夢想要有底線

郭政鴻在電視觀眾心目中總是「反派」擔當，入行接近40年，他慶幸出身在「神仙打交」的年代，仍然能憑武打根基在眾多小生之中，找到屬於自己的一席位。見到同期的好友們慢慢做到一線小生，曾經失意、自我質疑，但慢慢找到自己的位置，他笑言：「壞人唔怕做，最重要係觀眾記得郭政鴻呢個『壞人』！」

{{hket:ul-video id="9602"}}{{/hket:ul-video}}

郭政鴻在《叠影狙擊》中飾演新領域集團CEO楊俊雄，跟關禮傑飾演兩兄弟，為了賺錢不惜用盡一切手段，雖然同樣是反派的角色，但今次角色比以往更加霸氣。過往郭政鴻被列為「壞人」擔當或御用反派，他笑言其實有演過正派的角色，如《古靈精探》、《我的野蠻奶奶》等等，只是反派較易讓觀眾留下深刻印象。「以前無綫興起拍古裝武打劇集，有好多嘉賓好似元彪、趙文卓、錢小豪、元華等等，我都有份，而且次次都係反派。因為監製要搵有武功底子嘅人，同呢班正派主角抗衡對打，TVB要搵武功底子嘅人真係冇乜，仲要同元彪、元華佢哋對打，如果是旦搵個演員打，根本冇說服力，加上班武打明星都會打得無癮啦，所以呢類角色就落喺我身上。」

{{hket:inline-image name="DSC07727.jpg"}}{{/hket:inline-image}}

{{hket:inline-image name="DSC07777.jpg"}}{{/hket:inline-image}}

{{hket:inline-image name="DSC07770.jpg"}}{{/hket:inline-image}}

{{hket:inline-image name="4a71f24c-1541-476a-8005-dced6cc5bdf8.jpg"}}{{/hket:inline-image}}

{{hket:inline-image name="c5f13601-3b23-49e7-a31d-b86982ea35d0.jpg"}}{{/hket:inline-image}}

{{hket:inline-image name="5afba641-1d77-42f5-9e37-8918dbbc7e15.jpg"}}{{/hket:inline-image}}

郭政鴻帶囡囡出席好友新年聚會 兩個寶貝女越大越靚被讚似孖女【下一頁】

郭政鴻於1985年參加第二期無綫藝員進修班加入無綫電視，至今為無綫電視演出的劇集逾70部，由跑龍套開始慢慢由小角色到配角，他說：「我梗係想做主角，但點解一直都上唔到呢步呢？當年係神仙打交嘅年代，無綫人才濟濟好難出頭，要攀上一線演員唔係容易嘅事，除非你條件非常突出，好似古天樂呢種，否則真係好難上位。我好好彩，因為我有武術根基，先可以佔一席位，有機會演到反派。」

久久未能出頭當上一線男星，郭政鴻坦言初期當然會失落不快，幸好《大時代》拍攝時跟陶大宇成為老友，大家經常消遣飲酒，「當時佢都未爆紅，直至接拍《刑事偵緝檔案》，見證佢一步一步邁向成功，或多或少都會有羨慕，但我們識於微時感情非常好，大家老友鬼鬼，佢都會安慰我叫我加油。」郭政鴻認為娛樂圈講求天時地利人和，就算演技好都要講求際遇，他現時最看重的是角色的發揮，每次被記起「郭政鴻係演反派」，他就已經非常感恩。「有啲嘢好有趣，有啲劇集當年播出時未必好受歡迎，但若干年後會沉澱會成為經典，就好似《大時代》咁，當年首播收視一般 ，唔記得係咪跌市令大家心情差，唔想再睇，若干年後原來會變得很受歡迎，成為內地香港經典劇集第一位，絕對係意想不到！」

{{hket:inline-image name="abec08ee-6e42-4041-a597-bff08b0bc6af.jpg"}}{{/hket:inline-image}}

{{hket:inline-image name="b94c46c6-9f7e-4a83-b496-4e1641b5158e.jpg"}}{{/hket:inline-image}}

家族榮耀｜郭政鴻戲內戲外都係廿四孝老公 斥千萬購頂層單位擁無敵大城景【下一頁】

郭政鴻2011年與第二任老婆結婚，兩人育有大女郭倩欣以及細女郭詠之，一家四口生活幸福。政鴻由於工作不時要返內地，所以跟女兒只要一有時間見面就一定「打卡」。郭政鴻的兩個女兒越大越靚女，每次微博分享近照，網友們都不禁大讚，更鼓勵她們選港姐和入行，他說：「我唔會反對兩個女入行，但先要諗清楚，而家娛樂平台好多，好多網紅某程度比演員仲出名，除非好醉心做演員，堅持自己冇問題，但最重要係顧好三餐。我認為夢想係要有底線，過咗底線之後，要回頭重新開始唔容易。追夢係要有時限，知道行唔到落去或者達唔到理想，就應該要轉另一條路為自己設想。」

回看演藝事業的成長路，郭政鴻沒有大風大浪，默默耕耘成為大家認同的實力演員。若時光倒流二十年，他會否再一次選擇在「神仙打交」的年代入行呢？郭政鴻笑笑口說：「可能我思想比較守舊，如果畀我再揀一次，我都會選擇由低一步一步打好基礎，得到大家認同。講真，爆紅又點？真係一剎那呀咋，好多人都係咁，但有實力就會得到人哋欣賞。就算做唔到男主角一線，至少有一撮人對我有一定欣賞，認同好重要。如果得不到認同，做演員都冇乜意義。我希望人人見到我，講句：『好欣賞你演戲』、『加油郭政鴻』，呢啲感覺真係好窩心。」

{{hket:inline-image name="DSC07658.jpg"}}{{/hket:inline-image}}

{{hket:inline-image name="DSC07671.jpg"}}{{/hket:inline-image}}

{{hket:inline-image name="DSC07661.jpg"}}{{/hket:inline-image}}

立刻加入《晴報》WhatsApp頻道，獲取最新娛樂、健康及著數資訊，仲有送禮活動！
【https://bit.ly/3RnCHkV】

U Lifestyle App睇盡《晴報》新聞資訊及自家節目 ↓
↓↓同步更新、更快更順↓↓
【免費下載】

場地：PENTOLA
攝影：何家賢、黃敬博
撰文：楊安莉