陳奕迅（Eason）今日在澳門威尼劇場，為新專輯《CHIN UP》舉行發布會，自2005年加盟環球的Eason，即場宣布續約，吸引近千位中、港、台三地傳媒及歌迷到場。Eason 開心透露專輯收錄8首新歌，全由林家謙作曲，編曲部分則由李榮浩、林家謙操刀，他希望透過這張專輯，鼓勵大家正能量面對未來。
同場加映：麥明詩認愛盛勁為邊個追邊個？ 男友識做「滲入」未來外母社交平台
席上，一班小朋友演繹Eason與環球18年合作中的金曲，及後Eason與環球高層及經理人進行續約儀式，大會更公布Eason多年來的歌曲在全球串流播放量超過750億。
大會播出新歌《社交恐懼癌》劇場版MV，梁朝偉驚喜出現，飾演開鎖師傅，為被關在門外的社恐代表Eason開鎖，Eason透露原本邀請張學友飾演看更角色，希望出現《阿飛與阿基》的畫面，雖然張學友本身已應承，可惜最後因為檔期而未能成事。
CHIN UP!︳陳奕迅為新碟發佈會簽名逾4小時 感觸落淚：係好多人嘅心血【下一頁】
事後受訪時，Eason表示拍攝電影《擺渡人》而認識梁朝偉，今次大膽地向導演提出邀請梁朝偉參演一角，想不到對方一口答應，Eason續笑說：「原本看更角色係搵張學友，佢都應承咗，後來佢要拍電影，真係可惜，冇咗《阿飛與阿基》添，我有曾經諗過不如諗大啲，不如搵發哥（周潤發），變成《辣手神探》，我搵陳輝陽搵發嫂，因為佢哋一齊行山，但係又係因為撞期，發哥自己親自打畀我，佢話下次有機會，我冇所謂，其實我問完已經覺得好開心。」
陳奕迅澳門開騷被觀眾喝令講普通話 扯火反駁：你會唔會叫David Bowie講國語？【下一頁】
此外，對於早前開演唱會時，被觀眾命令轉講普通話，Eason當時黑面回應「你聽唔明咪算囉」，Eason說：「係我做得唔好，我係應該做我應該做嘅嘢，就係演繹我啲歌，係我太執著，其實之後場次都有人嗌，經一事長一智，唉，我係經好多事先長好多智，不過年紀會幫助到，唔使太在意，要識得放鬆，太緊張會有反效果，所以唔關觀眾事，同埋我咁嘅反應會影響埋其他觀眾，係我做得唔啱，我未試過跳medley係唔高興咁跳，唔係幾好，咁樣咪會辜負咗啲觀眾，其實唔啱，係我唔啱！」
提到Eason早前患上感冒，他指現時已經痊癒，最重要是有充足睡眠，他指自己明年50歲，笑言開始要養生，「我飲暖水㗎咋，中女咁㗎！好彩我不嬲都唔飲凍水。」
採訪、攝影：黃曉妍
立刻加入《晴報》WhatsApp頻道，獲取最新娛樂、健康及著數資訊，仲有送禮活動！
https://bit.ly/3RnCHkV
U Lifestyle App睇盡《晴報》新聞資訊及自家節目 ↓
↓↓同步更新、更快更順↓↓
【免費下載】