泰友情緣的歲月︳羅清浩憶亞視唔續約轉行做速遞 重提被驚傳死訊：又覺得冇咩嘢

已移居泰國的羅清浩近年多了曝光，曾經應楊紹鴻的邀請，在當地參與《向世界歌唱之泰港同心齊抗疫》及慈善舞台劇《豪門瘋暴》。今次他再接受對方訪問，於節目《泰友情緣的歲月》上重提2018年驚傳死訊一事，同時談到離開亞視後為何退出幕前及對娛樂圈是否留戀等問題。

同場加映：尹光愛玩乜都試誓要唱到90歲 「廟街歌王」籲政府搞旺夜市自救

{{hket:ul-video id="9217"}}{{/hket:ul-video}}

{{hket:inline-image name="09221002.jpg"}}{{/hket:inline-image}}

{{hket:inline-image name="0601LAW03_600.jpg"}}{{/hket:inline-image}}

羅清浩入行多年未上過一線，但他演過的角色令人印象深刻，特別是一些勢利、市儈的人物，包括《城市故事》Victor郭通天、《流氓大亨》二佬方學斌及《賭神》內「刀仔」劉德華的老友「排骨」等。當中《流氓大亨》於2018年重播時，驚傳他的死訊，有傳媒找劇中拍檔吳啟華求證。

羅清浩憶述︰「嗰時我仲喺香港，忽然之間收到朋友電話，話有記者搵我，無啦啦搵我做咩？我離開電視圈都有10幾年，朋友話『有人話你死咗喎』，我就話『吓！係呀？阿彌陀佛』…吳啟華有幫手，有記者搵佢問我嘅近況，佢有講我近況，我就話可以留個電話畀我搵記者啦，但佢就冇咗件事，不了了之…都冇咩影響嘅，呢行基本上都好多誤傳，我又覺得冇咩嘢，誤會啫！」

泰友情緣的歲月︳亞視視帝林韋辰爆曾交稅幾十萬 談行內辛酸：3日3夜冇得瞓【下一頁】

至於當年退出電視圈原因？羅清浩：「主要係2000年時電視台換咗老闆，我入去ATV時係林百欣年代，跟住公司換咗老闆，好多人事變動，公司話唔簽咪唔簽囉…最後一齣劇係《海瑞鬥嚴嵩》，去上海同無錫拍。（冇去其他地方敲門？）我份人好得意，人生有好多可能性，唔一定做一份工做到走為止。我好細個就出嚟做嘢，出版社、紙盒廠…唔記得咁多，每份職業到某個階段，會諗係咪時候轉一轉？話我念唔念舊又好，鍾意新嘅事情或新嘅開始又好啦，啱啱有個老友做速遞，冇簽約就入佢公司幫手，見緣分到就去試吓！」

泰友情緣的歲月︳韓馬利獲老公用泰文示愛勁冧 杜燕歌稱年紀大：工作忌操勞【下一頁】

有沒有留戀電視圈？他表示︰「唔到我留戀，佢又唔簽，求佢又未必求得到。（其他電視台冇招手或去敲門？）冇，我好怕靠人事，一來我好似孤兒仔咁，我係參加比賽而入行，同訓練班出嚟又唔同，佢哋有師兄、導師提點又可以去問，好多嘢都有前輩畀意見。我哋就係一個比賽贏咗走入電視台，人又唔識，部門又唔清楚，派到有通告就返去，做做吓就有啲機會，自己盡量勤力啲讀熟劇本，希望有啲表現，跟住就做咗咁耐，我個人又冇乜大志。（冇同人鬥？）冇，唔鍾意呢啲嘢，我唔係呢啲人。（又唔會同人爭？）冇意思，爭得到未必好，隨遇而安，唔需要框住自己喺度搏命做，好多時唔係你希望嘅嘢就一定實現到。」

（↓點擊放大睇圖片↓）

羅清浩今年3月參與慈善舞台劇《豪門瘋暴》，似乎激發不到他復出幕前的鬥心，「唔敢講，緣分啦，而家市場點知呢？（留喺泰國發展）我冇野心又冇大志，真係冇諗將來想做咩，睇吓自己條件符唔符合，符合到就做，符合唔到又唔會勉強。」

立刻加入《晴報》WhatsApp頻道，獲取最新娛樂、健康及著數資訊，仲有送禮活動！
【https://bit.ly/3RnCHkV】

記者：梁榮達

U Lifestyle App睇盡《晴報》新聞資訊及自家節目 ↓
↓↓同步更新、更快更順↓↓
【免費下載】