前醫管局九龍東、港島西及港島東醫院聯網總監、Virtus尚至醫療集團副主席暨首席醫務總監陸志聰醫生零架子、很親切，他非常尊重每一位病人。其關懷病者的舉動，可從他1986年當見習醫生時，脖子上那不分晝夜都打得整潔的領呔說起。
「當年，有位護士長代表一班護士嚟問吓呢位見習醫生，究竟點解半夜三更仲打住條呔，我同佢講，如果你係床上準備生BB嘅孕婦，你會想見到一位點樣嘅醫生？」
那時候的陸醫生25歲，是威爾斯親王醫院婦產科的見習醫生。
草根出身 入讀「貴族學校」學會包容
官仔骨骨、溫文爾雅的陸醫生草根家庭出身，爸爸在精工錶廠工作，媽媽主力打理家庭，間中會拿些「手作仔」回家作幫補，「如果以今日嘅語言，我5歲之前住嘅係劏房，當時叫板間房，全家人成日搬嘅，九龍城、新蒲崗、土瓜灣都住過，土瓜灣細到一張床四個人瞓，落地都冇位，飯都喺床食。之後屋企抽到入住『廉租屋邨』牛頭角花園大廈，有獨立廚廁好幸福。」他是四兄弟姊妹中的大哥，童年甚少跑到街上遊玩，和鄰家朋友仔通常在門外走廊聯誼。他印象中的鄰里關係十分和睦，誰家打仔、誰被炒魷、找到新工等立即戶戶知，情況跟現今社會截然不同。
「我細個讀書成績都好嘅，小一至小三成日考第一，但一路升班名次一路跌，雖然都喺十名內，但自己都覺得不是味兒。我個人好單純，冇探究原因，亦冇話整個Action Plan咁。教私校嘅讀書人爺爺，好想我轉去一間佢認為比較好嘅小學，所以我就插班插咗去聖約望讀小五小六。以我嘅成績，插班冇問題，但適應期好困難。有一堂書我呢一世都記得，個英文老師對住全班40幾人講：『陸志聰同學讀R同L啲英文發音要努力啲。我知你得嘅，我哋學校所有插班生都得嘅！』對於當時嘅我好大打擊，你喺幾十人面前講係好難受嘅，但的確有激發作用，不過，語言係要由細學起，我講嘅英文始終去唔到一個我認為比較好嘅水平。」
雖然父母很疼愛他，但人生規劃還是要靠自己，拔萃男書院是他的升中第三志願，「點解排第三，因為當年拔萃嘅貴族學校形象好鮮明，我住屋邨，揀貴族學校好似唔係幾恰當，但最後派位派咗去拔萃。」
陸醫生把我帶到他的母校拔萃男書院，坐在這充滿歷史氣息的校舍內，回味他的成長。
「可以總結你喺拔萃嘅『收穫』嗎？一生受用嗰種。」我問。
陸醫生毫無懸念：
「係包容性！學校唔想我哋讀死書，想我哋珍惜機會，培訓我哋專注、面對贏輸嘅心態、同同學之間嘅合作及建立友誼等。讀書時唔覺，但有咗人生經驗、特別係經歷過高低之後，就發現做人理念完全同中學時代嘅經歷連接，呢個好神奇！每個人都有自己嘅角色，有自己嘅責任，學校或社會可以畀好大自由度你，但去到某個位置，對唔住，唔可以越界。我喺醫院做咗咁多年，我成日同我啲同事講：『我會畫一個好大嘅圈畀你，請你喺裡面發揮，但唔能夠超越邊界。』其實做管理有兩套理論，一套係個圈好細，樣樣嘢都要批、要寫晒指引，但我唔信呢套嘅，綁手綁腳會令專業人士發揮唔到，專業人士愛自主、獨立，咁樣會唔開心甚至離職，但太放任又唔得喎，人命嚟㗎、公共資源嚟㗎，所以我畫個好大嘅圈，大到夠晒空間。」
- {{hket:inline-image name="p33.jpeg"}}{{/hket:inline-image}}
- {{hket:inline-image name="1.JPG"}}{{/hket:inline-image}}
- {{hket:inline-image name="1-40.jpg"}}{{/hket:inline-image}}
- {{hket:inline-image name="IMG_4553_20230715032517.jpg"}}{{/hket:inline-image}}
- {{hket:inline-image name="1-45.jpg"}}{{/hket:inline-image}}
- {{hket:inline-image name="1-69.jpg"}}{{/hket:inline-image}}
- {{hket:inline-image name="1-62.jpg"}}{{/hket:inline-image}}
畢業後正式行醫 接觸病人萌改變想法
行醫數年後，陸志聰醫生擔任公院管理工作31年。作為中大醫學院第一屆醫科畢業生，他表示當年毫無包袱，但有很多擔心：「原來冇師兄師姐指引㗎、原來啲老師來自五湖四海八國聯軍㗎，全部嘢都係第一次，梗係好多阻滯啦，個銜頭要人承認先得。讀完書，如果評審機構唔認可，就會浪費咗5年。我哋讀醫科，頭兩年留喺中大Campus讀，之後3年主要係醫院臨床教學。威爾斯親王醫院係我哋當時嘅教學醫院，但因為工程、因為人手、因為準備唔切等問題，冇地方容納我哋。解決方案有兩個，一係停學一年，大學當然唔想咁啦，於是探討過無數辦法，包括天馬行空地將我哋成批50幾人送去英國，但最後好彩得到基督教聯合醫院願意『收留』我哋做臨床，全港醫院得佢一間願意，真係要用『收留』去形容。」
曾經前途未卜、憂心重重的陸醫生，回望過去，說困難日子中得著其實比付出多：「院長、教授、老師好錫我哋，記得有一位最鍾意叫我哋做Boys、已故嘅英國教授話I will take care, no worry boys；另一位係當年我哋中大醫學院院長蔡永業教授，其實佢同我哋嘅距離有幾丈遠，再之前佢係醫務衞生署嘅署長，好有官威㗎，佢好嚴肅咁表示：『我哋會搞掂嘅！』呢啲都畀到同學好大信心。」
被醫科同學稱作「陸Sir」的他，常勸勉大家淡定面對，反正擔心與否都沒能力作出改變，所以被同學形容為「天跌落嚟當被冚」。面對逆境，他表現得 EQ極高，但內心的實況卻由身體反映出來，「其他人睇落我好鎮定，但身體唔呃人，因為壓力太大，我25歲生蛇，好記得考完試一兩日後就起水泡。」
1986年，陸醫生畢業後先到威爾斯親王醫院當見習醫生，到了87年，就要面對香港醫委會同GMC（醫學總會、General Medical Council）對香港中文大學醫學院畢業生的認可與否，若不承認資格，就只得「沙紙」一張，不能行醫，
「最後終於好順利咁承認咗我哋。第一年我去咗精神科，呢個係點解我對精神科病人比較上心嘅原因。我當時見到好多人間慘劇，好震撼，原來做醫生咁無助。讀書時以為學識就可以醫人，但現實係藥太少、藥有副作用、社會支援係零，病人冇幻覺都冇用啦，都冇人接受佢，現實同想像差太遠啦！作為一個醫生仔，可以做到嘅嘢係零，但好想改變嘅諗法已經種咗入心。之後兩年，我轉咗去伊利沙伯醫院做婦產科，我好鍾意做婦產科，因為迎接新生命好開心，但我諗如果30年後我仲係一個產科醫生，半夜3點要幫人執仔…我係咪想咁樣生活呢？加上當時有個機遇，於是就決定做一個好嘅家庭醫生，繼續去幫病人。」
那個時期的陸醫生，晚上還會做兼職：「去政府賽馬會診所做夜診醫生，係『被批准的秘撈』，主要負責好基本嘅『家庭醫生』嘢，例如發燒咁。雖然我每個月只當值3至4晚，但竟然有粉絲。有病人真係會走去問姑娘今晚邊個醫生，姑娘如果得閒就會幫忙睇睇簿，真係有人會等到嗰日先去睇病㗎喎！亦有人會數住我間房而選擇性攞籌，呢啲都係事後由護士話番畀我知，諗番起都開心嘅，當時我又唔係乜嘢大醫生，醫術又唔係特別高明，護士話：『病人鍾意你乜？每個病人步入診症室，你都報以友善眼神，同埋禮貌地請佢坐低。』原來嗰下眼神接觸同打招呼，甚至問一句：『食咗飯未？』已經令病人好滿意。我會以為好基本，但原來唔係個個（醫生）都咁做。呢個令我打後好多年工作時都掛喺口邊：『其實一般病人嘅期望同要求好卑微、好基本。』之後我做行政冇再直接睇病人，但仍抱住將最基本做得好、及持續做好佢嘅原則。多年經驗話我知，如果最高嗰個人唔堅持，原則好容易消失。」
後悔行醫年期短：希望直接幫更多病人
陸醫生行醫年期只有4年多，是他一直後悔的事，「如果人生畀我揀第2次，我會希望行醫10至15年、直接幫更多病人先至轉去做行政管理就最理想，但呢個世界冇最理想。行政管理就係要搞好制度搞好團隊，去處理風險同推動發展。風險管理、就好似一啲有關系統嘅事宜，例如擺放同派發藥物嘅，你處理好佢，錯嘅機會就會減到最低，質素就會好，就會安全。發展方面，人哋成日笑：『邊間公立醫院想重建，就去搵C.C. Luk做院長啦！』事實都係嘅，我做過嘅醫院，基本上間間都有大型工程，係講緊喺政府度爭取返嚟好多億嘅錢。」
陸醫生行政管理經驗豐富，先後任職廣華醫院、聯合醫院、瑪麗醫院院長，及曾擔任九龍東、港島西及港島東醫院聯網總監和東區醫院院長。談到「發展」的重要性，他表示軟件（包括人材）在醫療上一定比硬件重要，但去到某個程度，硬件便會局限了軟件的發揮，舉例在一間醫院，如把急症室、深切治療部和手術室的布局錯置，三者距離或太遠，急症病人的黃金搶救期，便會因為來來往往而被耽誤，就算病人被救回，時間也是一個成本，醫護人員本來可救多一個人呢！現成的醫院要改善這缺點，就只得重建，就只得爭取發展。
「以前有人會講：『公帑得咁少你期望乜嘢呀？』有啲仲會講得難聽啲：『有得醫咪算囉！』我就唔信呢一套嘅，我覺得點解香港要咁，我一直緊守住原則。喺醫院做嘢嘅同事有70%係專業人士，專業人士最憎停滯，追求今日好過噚日、聽日要好過今日。公立醫院嘅病人都係病人，我哋唔要雲石大堂、唔要對治療冇關係嘅奢華，但係好嘅醫療服務絕對係病人應得嘅嘢，咁當然有啲制度上嘅問題要去處理。」他說。
為全港病人工作多年，陸醫生最難忘推動公立醫院的發展，「有兩三間醫院嘅發展計劃，好似『沒有硝煙的戰爭』咁複雜。好多人眼中嘅我，係一有大件事發生就會企出嚟，喺電視見到我拆彈，其實兩面不是人，（崗位）好難做係事實，但都遠遠不及有一、兩間醫院嘅重建、擴建計劃，嗰個爭取過程嘅複雜性、困難度冇乜人知。我通常去到使命感好大嘅項目，就唔會諗辛苦，個人會好積極。搞好重建，間醫院起碼都延續三十年啦，裡面工作嘅同事喺新嘅環境好好發揮去醫人，你諗下比起我一個醫生、即使不眠不休日日睇症，受惠病人數目會乘大幾多倍呢？當然仲要搞好文化同團隊啦，好困難、好抽象，但好重要。我話我哋要當啲病人係自己阿媽，當同事係自己親人，但呢句口號不停講係冇用嘅，越講越反效果，下屬會覺得我講廢話，所以要潛移默化，透過自己做嘅嘢、做嘅決定去畀大家睇到。」
陸醫生的管理哲學，是「量度到的」與「親眼見的」兼備。前者是數字和報告，他認為只得報告一定死硬。
「最初10年，好多人讚我做事快靚正。我轉做行政後嘅第一份文件係『香港精神科應該如何發展』，十版八版紙、好多建議㗎，唔少建議到今天都仲係主流政策，例如其中一個：唔好困晒（病人）喺大型精神科醫院；第二：我哋要令病人喺能力範圍以內，回到社區生活。對於一般醫生嚟講，做行政管理嘅吸引力好低，作為一個醫生幫病人接生，下個鐘病人就多謝我啦，但做行政管理可能要去到10年後、30年後先至見到小改變，即使有改變，過程中有咁多人參與過，你都唔敢講係你嘅功勞，所以冇即時滿足感，滿足只能建基於信念 — 我覺得嗰樣嘢啱、嗰樣嘢有意義，崗位好難拿揑！量度到嘅數字、報告以外，一定要從多角度、貼地去睇每件事，要接近民間，最好就係走入去病房了解，睇吓同事嘅運作、病人及家屬嘅面口。」
平衡工作與生活：要約會自己
陸醫生溫馨提示《晴報》讀者，不要忽略工作與生活之間的平衡，要嘗試約會自己，「我有一段時間成日跑步，而跑步嘅原因係想迫自己放低工作，但用Keep Fit做借口。運動做慣咗會上癮，上咗癮就唔使再迫，唔跑嗰日變得周身唔聚財。之後，我再將跑步變埋工作，喺醫院帶隊搞馬拉松，去提升團隊精神同歸屬感，原來跑步唔係為咗自己，係有利於工作嗰喎，咁我個心理包袱又低啲嘞！其實呢樣嘢唔好，人係應該分配時間畀自己。近年，我建議同事要約會自己，無論約自己瞓覺、睇Netflix、聽音樂，抑或無聊行街都好，打開個期表約會自己，每個星期約一次。約咗自己但又無所事事嘅，千祈唔好覺得內疚。」
他亦嘗試用不同的理論，去幫助同事克服心理包袱，「嗰時跑馬拉松，有同事跑足7日，覺得要操到自己好犀利，但其實休息都係訓練一部分嚟㗎，呢個有晒理論，醫護人員相信理論，所以大家會容易聽入耳。我鍾意針對唔同對象，利用佢受邊一套，就用佢嗰套去講，當然有人會話唔知我講乜，然後講：『你想我點做咪直接講囉！』後生啲嘅我，聽到係有啲唔開心嘅，但好快已經過去，對方同我未啱Channel，其他人明白就得！樣樣嘢都係我做決定，還是我分析情況由大家做決定，當然後者先至細水長流、服務先至會好啦，前者只會有一班機械人。醫院嘅同事70%係專業人士，點會係撳粒掣就做呢！」
我問：「驚唔驚越嚟越多撳粒掣就做嘅人？」
陸醫生：「驚。」
對於科技的進步，陸醫生有以下見解，「打個比喻，我以前屋企樓下間超級市場，每次買嘢我都Check單，以前我唔Check嘅，因為信大機構，但近年頻密地出錯，有時收少咗錢，有時收多咗，於是養成我畀錢即Check單嘅習慣。其實唔關啲職員事，佢被科技駕馭係咁『拍』同『嘟』咋嘛，好似機械人。如果醫院都係咁就大件事啦！而家醫院好多工序都電子化，如果養成一『嘟』就唔理照做嘅文化，咁就唔敢想像。管理層同高級職員一定要守得緊，唔好令冇經驗嘅同事出錯。」
為醫療貢獻 盼影響更多港人
退休後的陸醫生，除了參與不少社會服務，亦出任醫療集團的副主席暨首席醫務總監職務，繼續為醫療作出貢獻。對於社會，他的信念從不動搖，「我好鍾意香港，我喺香港出世、香港長大。現在香港好多挑戰，正正因為咁，愛香港嘅人更加唔好放棄，做得幾多得幾多，希望透過我嘅接觸面去影響其他人，影響到一個已經好開心，結集大家嘅能力，我有呢一種諗法。當有事件發生嘅時候，就係透過處理去影響大家嘅最好機會。有事發生，第一件事要照顧受害人；第二要照顧有關嘅同事，因為佢哋照顧病人，見到病人有事會內疚同自責；第三先係事後處理責任同改善系统嘅問題。」
最後，作為打工仔的我，詢問Head過無數下屬的陸醫生：「唔怕犯錯及承認錯誤，係咪你最大嘅哲學？」陸醫生秒回：「我唔敢講最大，但我好Firm呢點！我曾經睇書、亦曾經喺哈佛大學上堂，領悟咗入腦嘅嘢係 — 唔好怕犯錯，因為只有唔進取、唔做嘢先至會唔犯錯。後尾我添加咗以下 — 唔做嘢唔代表冇傷害人，有人擔心去改嘢，因為要孭後果、要負責任，但如果應該改而唔去改，亦都係一種傷害，同埋同一個錯誤唔可以犯第二次。至於認錯，我讀大學及做見習時學習嘅，做錯事要面對當事人，Say Sorry真係好難，好多謝教懂我嘅教授同護士。」
U Lifestyle App睇盡《晴報》新聞資訊及自家節目
↓↓同步更新、更快更順↓↓
【免費下載】
撰文：陳小芝
編輯：陳潔雯
攝影：陳健珊、黃敬博