10月免費導賞遊「港版築地」 現接受報名

由南區龍舟競渡委員會倡議嘅《漁港濃情‧香港仔》將推出壓軸活動，黛安聽聞，10月至11月嘅周末及周日，佢哋會舉辦「香港仔漁港城市暨魚市場精華遊」，導賞員會帶大家探索「港版築地」嘅獨特風貌，包括水面社區變化、漁業轉型新方向、收魚船喺魚獲批發扮演嘅中介角色等。

導賞遊由鴨脷洲出發，行程包括參觀龍竇嘅特色社區角落、乘坐街渡到對面岸嘅香港仔海濱，喺街渡上體驗城市中嘅漁港魅力。此外，仲會到香港仔魚市場參觀，由具漁民背景嘅顧問做導賞員，導賞內容大至漁業運作，小至如何揀靚海鮮都會逐一解答。

每節約兩小時嘅導賞遊，現已接受報名，參加者除咗要自行支付乘坐街渡船費外，活動費用全免，名額有限。12歲或以上就可以報名，詳情可【按此】參考。