DFI零售實習生計劃 設多元化實習體驗培養零售人才

早前DFI零售集團推出首個「DFI零售實習生計劃」，為15歲或以上中學及大專生，提供喺集團旗下品牌如惠康、7-Eleven及萬寧嘅暑期實習機會，畀學生透過應用實戰，認識更多零售業嘅工作及發展趨勢。

黛安知道，計劃自6月推出後，共收到逾800份申請，錄取咗202名學生。今次實習更特設彈性上班時間及地點，方便學生平衡暑假活動及實習工作，並加入唔同工作坊，教佢哋待客之道、溝通技巧等，藉此畀實習生探索未來嘅職業興趣，及早規劃升學和就業方向。集團日前舉辦計劃結業禮同分享會，管理團隊亦分享唔少寶貴工作經驗，及向實習生頒發證書，表揚佢哋嘅努力。

過去兩個月喺7-Eleven實習嘅Issac話，體驗過收銀、沖咖啡、上貨等崗位，可從另一視覺了解每一個崗位辛苦之處，更可將學校所學嘅知識應用與實踐，覺得獲益良多。