漁民拜廟習俗製紀錄片 免費供學校作教材

具漁民背景嘅龍舟組織喺香港歷史悠久，黛安聽聞，南區龍舟競渡委員會透過非物質文化遺產資助計劃嘅支持，早前實地攝錄咗漁民龍舟嘅拜廟習俗，仲訪問咗兩代漁民有關拜廟嘅意義，並製作成紀錄片《漁民龍舟的拜廟習俗實錄》，供學校或有興趣團體免費使用，學校亦可組團去鴨脷洲嘅龍竇參觀及即場睇紀錄片，有興趣可電郵fishermen.museum@gmail.com查詢。

紀錄片全長約15分鐘，去咗4所廟宇參拜，包括鴨脷洲洪聖古廟、鴨脷洲觀音廟、鴨脷洲大王宮廟及香港仔天后古廟，簡介鮮為人知嘅拜廟前軟件和硬件準備等，紀錄片已上載至香港仔漁民文化博物館，有興趣可【按此】瀏覽相關資訊。