晴報VIP | 信仰 + 焗豬扒飯改寫人生 香港大學藥理及藥劑學系系主任 黃志基教授：「盼藥劑師成市民依靠醫療團隊」

香港土生土長的國際藥劑學權威、香港大學藥理及藥劑學系系主任黃志基教授，是鮮魚行學校校友：「以前嘅大角咀有『篩選效應』，好多基層及新移民住喺嗰區，到佢哋一發迹就會離開，所以該區來來去去都係基層。我父母冇讀過書，家長嘅知識水平唔高，仔女學習難度就會高一層，同而家啲人講嘅『輸在起跑線』一樣，但都有好處嘅，因為鮮魚行附近、九龍殯儀館隔籬有一個柳樹街球場，我哋童年好多時間都會喺球場打籃球、踢波。嗰陣啲朋友比較純品，唔算係壞，但肯定有啲朋友有ADHD（專注力失調及過度活躍症），非常之肯定佢哋有，當年只係覺得個個都好衝動。」

{{hket:inline-image name="quote-08.jpg"}}{{/hket:inline-image}}

{{hket:inline-image name="IMG_3068_20230622201023.jpg"}}{{/hket:inline-image}}

黃教授童年時會行路返學、有時會從大角咀徒步一小時到蘇屋邨游水，「因為冇錢搭巴士！」

「父母有冇擔心過你學壞？」我問。
「佢哋好簡單，我唔去偷、唔去搶已經好開心。」他笑著說：「成長期四周圍都冇專業人士，我阿爸做廚房，阿媽做洗碗，家姐全部喺工廠做，家人期望我一係做飲食，一係做工廠。」他一度選擇了前者，卻沒想過一碟焗豬扒飯會改寫其一生。」

「我會考肥咗科英文，於是去咗間連鎖快餐店負責焗豬扒飯。記得有一次我焗緊豬扒飯時，心諗唔通成世人都要喺度焗飯？諗得太入神，『嘭』一聲啲飯跌晒落地，洗碗阿嬸即刻上前問我有冇事，我話冇嘢冇嘢。我阿爸都係做酒樓，焗豬扒飯亦都冇問題，只係我覺得自己應該可以做其他嘢。於是我自修重考，終於考到上去讀A-Level，雖然考唔到入大學，但都有專上學院取錄我，可惜入唔到我想讀嘅學科，其實我鍾意讀science。」

信仰改變生命 留學英國開始藥劑之路

黃教授的生命轉捩點還有一個：「A-Level嗰一年我做咗基督徒，信仰將我成個生命扭轉。」他年少時十分情緒化，曾跟女友鬧交而脾氣失控，缺席會考Oral而導致英文科肥佬，「完全冇諗過後果，其實肥咗科英文等於玩完。」他後來結識了一位從英國回港的女生，女生把他帶到教會，然後他信了主，思想變得正面、性格變得冷靜隨和，再然後，女生成為了他的太太。

「太太係我去英國讀書嘅一個好大嘅誘因。我之前冇諗過會去英國，因為冇可能負擔得到（學費），但識咗佢之後就去探討，發現當時香港政府同英國政府有助學金計劃，嚟自中下家庭嘅我合乎申請資格。於是我決定博一鋪，帶住唔夠一年嘅學費（四萬港元），毅然飛咗去英國再等助學金批出。好感恩，半年後資助順利批咗，我就喺英國讀咗三年書，期間冇返過香港。第一年暑假，我喺一間藥廠做咗十三個禮拜，搵到足夠我下一年生活嘅錢。第二年暑假我去咗兩間醫院實習，搵到嘅錢又夠我第三年生活。去到第三年，我已經山窮水盡，四萬蚊同暑期工搵嘅錢早已用晒，幸好有同住嘅一班教會基督徒接濟，仲有來自馬來西亞、同班一齊讀藥劑嘅同學Jacob Yeng 同佢弟弟 Francis（醫學生）幫忙。有一日Jacob拍我門問：『Ian，你有幾耐冇返過香港？』佢放低一張四百英鎊嘅支票，叫我返香港見下父母，真係有情有義。」

黃教授形容自己在留學的日子，見盡了世上最美好的事，以及吃盡了不同煮法的雞翼，「最後一個學期，全屋人都係final year，個個殺到天昏地暗。一年班嘅學生好好，會主動嚟幫我哋煮飯。佢哋一拉開個雪櫃，全部都係雞翼，因為最平，畀一英鎊已經買到三餐份量。我食咗幾個月雞翼，一年班同學好有心思，蒸炒煮炸炆、豉油雞翼乜都有。當年嘅一年班小朋友們，而家都仲喺WhatsApp group入面。大家一齊共過患難，感覺好似家人咁親。」

談到藥劑之路，黃教授表示在英國做藥劑師不愁出路，「嗰個年代讀完藥劑，就可以留喺英國做嘢，護士都係，第三種職業係會計師。當時已經肯定我將來唔使擔心生活，呢樣嘢好好呀！」

我說：「三種職業你哋中咗兩個。」

黃教授：「冇錯，我太太係護士。」

「其實擁有任何醫療衛生專業，都能夠照顧到屋企。我選擇藥劑，係我對前途嘅考量，以及對science嘅熱愛。藥劑係一個好有趣嘅科目，當中涉及化學，我哋要由化學品整到變粒藥，又要識得物理，因為裡面有好多計算，好多力學，部機要點搓粒藥出嚟呀、藥水點樣喺當中溶解咁。仲有生物，身體就係生物嘅構造，藥劑有晒所有讀過嘅科學。」

喜歡think out of the box（打破常規思考問題）的他，自認不能死讀書，不是那種回答model answer的學生，因此在中學時期未能好好發揮。信了基督，和決定到英國留學這兩件事，為他帶來了徹底的改變。

「教會令我將負面想法變成正面，而去英國讀書，就令我明白自己具備邏輯思維，加上記藥又記得好好，外籍同學都叫我做walking BNF（英國國家處方藥典）。」

藥劑師薪酬高，不愁沒工作，既然生活得到了保障，為甚麼還要投身科研，帶領多個跨國研究項目這麼辛勞呢？

黃教授說：「作為一個基督徒，神畀咗咁多恩典我哋，係想我哋成為其他人嘅祝福。知道可以做改善社會嘅事，點解唔去做呢，同一時間亦會令自己變得更好。我喺英國倫敦大學工作時，同一間兒科學院合辦咗間公司，目的係去睇吓點樣將一啲藥，做到小朋友都適用，其中一隻成功研發嘅腦癇症藥，現在喺歐洲已廣泛被使用。一個藥劑師可以研發一隻藥出嚟，而每一日都有病童用緊，對社會及自己都係好事。現在香港啲病人冇（藥），我咪去諗下點樣將我喺外國研發嘅嘢，拎番嚟香港囉，所以同衞生署傾緊方案。」

組科研團隊 成「醫療大數據研究之父」

大數據研究方面，黃教授指香港很獨特，因為我們擁有「電子健康紀錄互通系統」，由HA（Hospital Authority，醫院管理局）聯繫公、私營醫護的病人病歷。現在我們覺得這是必然的，其實真的不是，這是一個世界上很獨特的資訊平台。醫療上，我們的互通系統很成功，但在研發上，卻比其他地方落後。

「外國用醫療大數據用咗幾十年，我喺英國做呢啲研究做咗廿幾三十年，至於香港嘅全面使用，就係我喺2011年返嚟先至開始。」他領導著一個由60名醫療大數據研究團隊組成的科研團隊。他的學生和同事稱他為「香港醫療大數據研究之父」，因為他的開創性工作以及他所領導和指導的大型團隊。由於他在醫療大數據研究方面的專業知識。

「我哋團隊利用大數據去研究點樣用藥用得更好，我哋有一間24小時有CCTV監控、電腦冇駁互聯網嘅房，內藏全港打咗新冠疫苖人士嘅匿名（無名、無地址、無出生日期）數據，幫香港政府監察住全香港所有疫苖嘅安全。我哋團隊係全球第一批發現疫苖同面癱有關係嘅人。呢件事打開咗一道大門，令衞生署知道將來所有新嘅疫苖、所有新嘅藥物，都可以用同一制度去做，當然醫管局好支持啦，如果唔係都做唔到。另外，我哋一路監察住心肌炎嘅問題，知道邊啲人打完針之後有心肌炎，就繼續follow-up呢班人，我哋默默咁檢視住香港人嘅健康。」

要具備甚麼資格才能加入黃教授的研究團隊？「思想開明、願意學習最重要。我成日同我團隊講，如果學到啲新嘢請帶返嚟畀我，我都想學習，坦白講，年青人學嘢快過我呢個年紀。我哋嘅早排有位同事，喺哈佛學咗新嘅研究大數據方法，我哋話：『咦，好嘢嚟嗰喎，不如大家一齊用啦！』好多時傳統科研隊伍，都會有一個好叻嘅人，個個聽晒佢講，我哋概念唔同，七位同事大家手牽手前行，可能行政上會由我做決策，其他嘢同事可以做決定，如果每樣嘢都要問我，成個部門效率會好慢，喺我哋學系，最成功就係團隊每一位都可以係leader，但我一定會補番最重要嘅一句：『有鑊我會孭！』但so far冇人畀我孭鑊。」他說。

{{hket:inline-image name="DSC00342.jpg"}}{{/hket:inline-image}}

錯過不同時刻：可以做更好

黃教授賦予同事決策權，讓研究團隊為「自己的項目」做決定，從而栽培下一代。教導自己的子女方面，他又有甚麼心得？他先從大兒子說起。

「大仔十五、六歲時好反叛，但去到十七歲左右IQ同EQ終於成正比，因為佢經歷過A-Level考試撻Q，跟住我哋一家搬返香港，佢就返嚟讀IB（國際文憑大學預科課程），讀IB令佢發覺真係要勤力讀書，同埋阿爸都真係有佢嘅理由。我同太太曾經chur住佢，但正如我阿媽講：『你都曾經係咁嘅啫！』所以我哋退一步海闊天空，經一事長一智，同個女嘅相處好好多！」他大笑：「我都碰到一鼻子灰，無理由咁蠢啫，所以話我個女好幸福囉！阿仔話覺得我錫阿女多啲，我話唔係，因為阿仔出世時冇說明書跟埋，冇講明佢發爛渣我要點樣做、佢肥佬我要點做，冇㗎嘛！洗衣機唔work，睇說明書就知㩒邊個掣，再唔work就打電話，我部洗衣機早排就係咁。」最後，兒子發奮讀書，成功考入優秀的大學，然後搵到一份理想的工作…

「但係…我估每個父母都一樣，你明知仔女有自己性格，明知有一條路佢哋會去行，你未必agree，會話畀佢哋聽條路未必係最好，但無論如何都要去support佢哋囉！」

「會唔會因為太忙，而錯過佢哋某啲時間？」我問。

「應該係其中一樣我可以做得更好啲嘅嘢。」他說。

最令黃教授覺得「錯過了」的，是父母。母親是他2011年帶同太太及子女回港的主要原因，「2009、2010年我阿爸由病，到佢去世，令我覺得自己過去幾十年，其實冇盡過做仔嘅責任。我可以安慰自己其實父母想我讀書、想我出人頭地，我已經做到，但我又會覺得自己可以畀多啲時間父母，所以我返香港，畀個機會我同我啲仔女去認識我媽媽。見我學有所成阿媽好開心，但對佢嚟講，佢唔會明白讀碩士、讀博士、做教授有乜嘢意義，佢認為大學畢業已經足夠。疫情前幾年我哋多咗機會傾偈，好可惜佢疫情期間過咗身。」

盼大眾多了解藥劑

作為藥劑學權威，他感到香港人對藥物認識普遍不深，「喺外國，好多人對自己食開嘅藥好熟，香港人冇咁熟悉，其中一個原因係大部分藥名，都係由英文譯過嚟，個藥名你冇可能記得到，再加上香港人唔太鍾意問醫生、護士、藥劑師問題。亦有好多得意嘅concept，例如覺得啲藥食食下會『醇』、食得多會上癮，或者認為哮喘吸劑吸得多會上癮，所以我唔吸喇！血壓藥又係啦，膽固醇藥啦，連精神科藥物都係。好多時點解啲病唔受控制？因為冇食藥，去睇醫生時就話自己有食藥。另外喺醫療制度方面，睇完醫生，喺外國每次攞藥會開一個月畀你，有問題好快可以同藥劑師講，以前HA（醫管局）通常畀六個月藥，而家就三個月，坦白講一句，藥物要調校，變相好少人去監察病人，因為個制度係盡量令病人拎走啲藥、唔好返嚟，咁就搞掂囉！」

黃教授叮囑大家生病時記得多問專業醫護意見，多了解藥劑、藥物，令藥劑師成為其中一個市民依靠的醫療團隊。

{{hket:inline-image name="DSC00317.jpg"}}{{/hket:inline-image}}

U Lifestyle App睇盡《晴報》新聞資訊及自家節目
↓↓同步更新、更快更順↓↓
【免費下載】

撰文：陳小芝

編輯：陳潔雯

攝影：陳健珊

{{hket:inline-image name="11.jpeg"}}{{/hket:inline-image}}