商台DJ張子君昨日正式離開電台工作，她主持雷霆881的晨早節目《晴朗早晨全餐》及《十八樓C座》廣播劇中聲演的任意菲，同樣深得聽眾的支持，所以不少聽眾都留言對她的離開大表不捨和可惜。張子君2019年入職，同年亦是香港「佔中運動」的日子，她獲安排聲演《十八樓C座》的茶客「任意菲」，於4月10日告別聽眾，劇情交代她跟法國男友結婚並移居當地，亦是繼去年5月「拉表叔」馮志豐移民台灣後告別節目後，再有成員離開。
同場加映：邵卓堯演奸角駕輕就熟望加深層次 離婚後跟前妻女兒保持良好關係
十八樓C座丨「孻表叔」馮志豐暫別香港去法國學廚 周老闆叮囑：千祈唔好衰畀人睇【下一頁】
《十八樓C座》節目中對再有成員離開都大為感慨，將情懷放在劇情之中，祥嫂說：「唉，拉表叔走咗，而家阿菲都走埋，周記可能真係越嚟越冷清。」精甩美指：「問題唔係淨係周記冷清，我怕成個香港都越嚟越冷清。」節目「靈魂人物」周老闆則諷刺回應：「人才流失，就等嗰班個個月袋幾十萬人工嘅人去諗啦！」然後任意菲歎埋周記最後一杯金牌咖啡後，就正式離開《十八樓C座》。
無論是《晴朗早晨全餐》還是《十八樓C座》的聽眾都有留言為張子君打氣，「感謝子君主持《晴朗早晨全餐》，為我每一朝早叉足電」、「子君加油，習慣每朝聽你把聲。第時有啲唔慣」、「聽緊子君做節目，好唔捨得，子君唔好喊，有緣再見。」等等。
「拉表叔」回歸《十八樓C座》客串 馮志豐去年離職商台移居台灣【下一頁】
而張子君昨晚撰千字文表達在商台雷霆881工作的心路歷程，她透露自己將會移民英國，並靠YouTube繼續為香港發聲。內容如下：
終於過埋我喺商台嘅last day，先感受到我真係要離開呢個地方。尋晚行出商台一刻，除咗唔捨得之外，都有鬆一口氣嘅感覺，終於唔駛四點起身！我房嘅窗簾終於有用！當然亦都係因為卸下左一份我好珍重嘅責任。
我其實並唔係新聞系出身，最主要原因係我考唔入，話晒以前A-level冇一條A都唔駛旨意入到新聞系。畢業之後都係好想嘗試傳媒嘅工作，記者或者主播都唔會輪到我，見到商台請時事節目助理，覺得好啱自己，最重要係冇要求新聞系畢業，所以就即管試吓。嗰陣先係五月，其實自己乜鬼都未ready，諗住純粹吸取下見工經驗，點知真係請咗我，仲要一做就做到我唔留喺香港，如果我知我會做咁耐，當年一定會揀公積金囉lol。
入職嘅時候，其實已經醞釀佔中，去到九月「正式啟動」，啱啱畢業嘅我就喺呢個崗位，遇到香港呢件嘅大事，心情難免有點激動，可以成日去佔領區採訪、錄音、製作各式各樣嘅segment，唔同立場，唔同聲音都可以喺大氣電波發放。最開心莫過於搵到一個動人嘅故事，襯落一首夾嘅歌，MIX到個靚嘅segment 。（聽講玩時事夾歌，商台做得仲早過《頭條》，不過都好難再考證）
記得佔中清場當日，我同另一位同事被指派去金鐘，一方面觀察現場情況，另一方面就捉人錄音，我最深刻係當時明哥一個人企咗喺度望住留守者方向，我仲心諗：嗰個真係明哥？點解冇人訪問佢？我就膽粗粗過去同佢打招呼，邀請佢錄音，講出金鐘最令佢難以忘懷嘅一樣物件，佢話係連儂牆。（我錄完啲記者先識埋去）
佔中落幕，各陣營分化，互相攻擊，雖然覺得無奈，但喺傳媒角色又可以令我用另一個角度睇多啲，訓練我唔會好容易跌落一邊立場之後，就瘋狂攻擊另一邊。只要係合情合理合邏輯，其實都不妨了解多啲。
喺公司做咗咁多年，都唔係冇諗過要離開，但係喺2019年頭，知道自己有機會可以接下六點半至八點嘅時段，當然想把握機會。記得公司問我節目改唔改名，當時諗如果繼續叫《在晴朗的一天出發》，我就可以周圍同人講我係「晴朗」嘅主持，真心會威好多。不過我好想做啲同過往唔同嘅風格，思索良久，我最初提議《早晨全餐》，因為俾到人精神同包羅萬有嘅感覺，不過公司驚太似老麥sponsor冇批。最後，上頭決定加埋「晴朗」牌頭，成件事就合理哂，亦都好開心而家有人記得呢個節目名。
2019年7月1日，《晴朗早晨全餐》正式開播，我永遠都會記得呢一日。當時大家都知係咩事，所有事情都變得好快，發展得好極端，各方會做嘅事都係冇想像過。當時就算幾多壓力，我覺得呢個崗位係要堅持住，因為係見證緊一個歷史嘅轉捩點。
不過最大壓力嘅係之後嘅幾年，好多嘢已經唔可以合情合理合邏輯咁發生，而且唔能夠批評呢啲唔合理嘅事（which呢個係我職責），我知道我真係唔可以做落去。其實我大可以轉行，唔一定要離開香港，但我係唔捨得我以前能夠做到嘅野，好想再試下，想知大家對我講嘅野仲有冇興趣，亦都好想試下喺呢個平台可以做到啲乜。（btw未訂閱「子君channel」嘅快啲去YouTube撳個掣，可以令google多啲推我嘅片）
今朝終於追返尋日大家嘅DM同留言，聽眾嘅反應係令我意外。要明白香港人係鍾意投訴架嘛，所以一直以來，喺公關部收到嘅意見，大部份都係鬧我，由懶音、立場、內容到話我搶咪，有啲人好鍾意投訴我含沙射影，我真心R哂頭，含沙射影有咩問題；仲有鬧我係女版陶傑，我都開始懷疑啲人其實係讚我。
總之一般意見反映都係負面，所以我都唔知有一部份聽眾真係會咁唔捨得，亦冇諗到明報同阿Jan哥會喺903晴朗Jingle講（咁當然最主要原因係有人離開《十八樓C座》），更加冇諗到尋日上埋連登熱門，大家嘅反應會令我之後YouTube更有動力。
離開真係有嗰種自責嘅情緒，覺得自己係放棄咗，冇堅守落去，甚至我覺得如果有人鬧我拋棄呢度，我都完全冇得反駁，但係大家嘅留言都係體諒同祝福，唔少嘅dm都睇到我好感動，你哋嘅祝福我都收到，我都會努力轉化呢種情緒為力量，希望可以做到少少有用嘅嘢。
相信世界各地嘅香港人，就算喺唔同嘅道路上，只要堅持，最終都可以一齊走向美好嘅終點。
U Lifestyle App自家節目登錄《U TV》專區！
↓↓試玩、試食、試用影片任您睇↓↓
【立即體驗】
撰文：娛樂組