與陳浩民小紅書拍片鬥刷牙 孫耀威出大絕用廁所鮑魚刷插口

現年49歲孫耀威近年主力喺內地發展，本身係歌手嘅佢行網紅「路線」，不時喺社交平台發佈影片維持人氣。早前佢就於小紅書上載短片，以「唔記得開美顏」為題，以「老年」特效變阿伯吸引網民。孫耀威除咗自己一個拍片，仲不時搵嚟老友陳浩民齊齊拍片增加趣味性，日前佢嘅一條「鬥刷牙」片就引起討論。

同場加映：神之拉闊丨鄭欣宜被嘲揀跳舞歌懷舊勁激動 Anson Lo勁歌熱舞後因胃痛拒訪

{{hket:ul-video id="6993"}}{{/hket:ul-video}}

日前孫耀威邀請陳浩民拍「攀比人生」嘅搞笑片段。短片中先係孫耀威用牙刷刷牙，之後佢一臉驚訝嘅表情，鏡頭一轉陳浩民將大量牙膏唧喺浴室清潔刷刷牙；孫耀威亦不甘示弱，拎出廁所鮑魚刷唧滿牙膏，再塞入口用力刷到一口泡，瞪大雙眼表情狀甚痛苦。孫耀威打下caption：「攀比人生......兄弟，相煎何太急。」

{{hket:inline-image name="chm10_600.png"}}{{/hket:inline-image}}

有粉絲非常欣賞二人瞓身搞笑，一啲明星架子都冇；不過都有好多網民唔受落，留言踩到盡：「變態，低級趣味」、「無語，有必要嗎？」、「以前的一線明星也要拍這種短片搶眼球。」、「看到就有點想吐，為了流量真是拼了。」

其實陳浩民同孫耀威不時合體拍片，之前曾為內地千萬網紅「國岳夫妻」撐場，兩人更與「國岳夫妻」一起拍攝了20幾段影片，不過片中「國岳夫妻」做主角對鏡頭大曬恩愛，陳浩民同孫耀威就分別站在兩側為他們唱歌伴舞，被指似足迎賓，自貶身價。

「國岳夫妻」直播期間佢哋更全程企後排微笑，兼任助手幫手遞嘢配合帶貨。陳浩民同孫耀威全程極少出聲，只係不時呼籲大家落單，但表情似乎唔太自然，場面尷尬。

圖片來源：小紅書