最近熱播的無綫劇集《下流上車族》，由林敏驄配搭好戲之人江美儀、鮑起靜以及一班新晉演員，故事輕鬆帶出一家人為了「上車」而出盡法寶，劇中橋段甚為寫實，反映了香港現今核心問題，笑中有淚。作為金像獎影后的鮑起靜，首次跟林敏驄合作之外，亦與老拍檔江美儀再續戲緣，至於新晉演員就有鄧智堅、郭栢妍、羅毓儀和丁子朗等人。她接受《晴報》訪問時表示今次跟台前幕後的人合作愉快，林敏驄經常不跟稿「爆肚」，他們在互相影響下，擦出不少火花。
飾演Emma婆婆的鮑起靜，獨居住在一間公屋，兒子（林景程飾）飛往日本結婚剩下她一人。林敏驄和江美儀這對夫妻，因儲不到首期買樓，企圖騙取Emma婆婆的單位。拍攝時，一班「老戲骨」大鬥演技，鮑起靜謙稱：「阿驄唔睇劇本，好多即興嘢，美儀下下回到佢，雖然我冇美儀咁勁，但拍拍吓都得，好多意想不到嘅效果出嚟，不論笑同喊，都有啲撞到出來。」
外表讓人覺得輕浮的林敏驄，最令鮑起靜感到意外：「以為佢成日搞笑，都會覺得佢拍唔拍到喊戲㗎？或者會正經拍到感情戲？但原來佢會，有場戲講到佢同美儀產生誤會，激動到要離婚，見佢咁慘就勸佢，作為一個媽媽嘅心情，見個仔咁痛苦，一下子悲從中來，但講講吓兩個人一齊喊，劇本原本冇，但出來效果好好。」
下流上車族丨鮑起靜用日文向親家道歉搞喊觀眾 林景程一take過演技獲洗版狂讚【下一頁】
已經從演50多年的她，1979年加入麗的電視，曾在亞視效力多年；如今時移勢易，亞視成了「永恒」，只得無綫仍然存活。以往兩台爭收視，不斷製作多套劇集火拼，但隨著環境改變，拍攝團隊都不同。不過鮑姐作為演員，不感變化太大，拍劇時仍有「打仗」的感覺：「其實一樣，好似拍呢個戲都好似打仗㗎！呢個組合好新，一定要做啲好嘢出嚟，等大家鍾意，加上呢個題材，我接嗰陣見到『下流』兩個字，已經覺得好喜劇，好期待。
拍攝方法係同以前有唔同，我老演員以前由三機拍攝，拍之前要排好嗰場戲，全部演員試晒走位，就算外景都走好先拍。而家製作方法反而同電影接近，當然拍感情戲梗係想三機拍，一take過，但跟住而家節奏，製作方法又會好啲。」
下流上車族｜鮑起靜眼濕濕道盡獨居老人苦況 林敏驄哽咽憶亡母：子欲養而親不在…【下一頁】
鮑姐在劇中飾演一個獨居老人，兒子和愛犬都不在身邊，令她感到寂寞，很多場戲都賺人熱淚，亦帶出了社會上老人抑鬱的問題。鮑姐已經72歲，踏入銀髮族，但她身上並沒有普遍老人家潦倒和欷歔的味道，反而容光煥發、朝氣勃勃；臉上雖有點歲月痕跡，但經常「哈哈大笑」，旁人都感受到她的喜樂：「一個人年青時，可能會擔心自己老咗會點，但老咗就會坦然面對。我覺得老人家唔係唔認老，係要認老，知道自己70幾歲，事實係去到呢個歲數，就要諗自己點樣可以活得好？係咪下下都要人照顧你先？『老咗唔可以咁做』呢啲唔好咁諗呀！心態唔能夠老，喺你能力範圍內，身體冇乜疾病的話，可以去做嘢或者做義工。唔使好似話我哋咁樣做戲，但都可以做吓義工，關心吓身邊人，使自己生活充實，咁過晚年會好啲。」
活得積極、找出興趣來建立生活寄託，鮑姐令自己的人生變得豐盛，想了就做，隨心又隨意：「我唔使做嘢時都好忙，不斷睇戲，作為演員要不斷吸收新演技、新嘅做戲feel（感覺），要睇好多戲不斷學習。我會提醒自己，演戲創作天地無限，Emma婆婆其實可有好多演法，自己揀一個去做，當中有好多學問。其實一般老人家可以搵自己喜愛的，睇書、交朋友、打麻雀都係，搵出生活情趣，生活先有快樂。」
鮑姐精神上好動，熱愛生活，不斷尋找新興趣，令生命「保鮮」：「我以前唔做運動㗎，但跟咗發哥（周潤發）學慢跑，我就愛上呢個，每日郁吓跑吓，跑步未必身體好，但搵到生命意義，會覺得熱愛生命，希望生命充滿樂趣。呢啲要自己尋找，自尋快樂開心，唔可以自尋煩惱。我好多樂趣，但唔會有太多計劃，隨遇而安，冇工作就休息，同朋友開心過，就係咁簡單就得。」
鮑姐與丈夫方平育有一女方之樺，女兒16歲的時候已到英國讀書，及後定居在當地打工，並組織自己家庭，婚後育有兩個小朋友。劇中的Emma婆婆一直想跟兒子去日本生活，但現實中鮑姐就耍手擰頭，不願跟女兒在英國生活：「從來冇諗過離開香港，老人家嘅事，年青人未必明白，但你到咗老人家，如果而家啲仔女話帶你去澳洲、去日本，好似Emma婆婆以為日本好好，真係儍儍地，千祈唔好諗呢啲，冇一個地方，比喺你生長嘅地方過你嘅餘生更好。」
因為分隔千里，一家人會靠視像電話每天聯絡見面，有時候為了見孫兒，兩老亦要捱夜。提起家人，鮑姐的喜悅完全表達出來：「因為時差，有時我哋夜啲瞓，就可以睇到啲孫食晚飯、放學。啲小朋友放假好忙，學游水、學中文，好忙碌㗎﹗」因為疫情，一家人已有3年多沒見，鮑姐計劃在12月飛到倫敦見她的心肝寶貝們。
仔大仔世界，鮑姐對女兒一直採用開放而且信任的態度，讓女兒成長，見女兒長大後持家有道，也倍感安慰：「我好驕傲㗎，我個女好不容易喺英國，所有嘢自己做，請唔到姐姐，要返工又湊兩個小朋友，管接送返學放學，又要煮飯，好了不起喇！初初去到遇到問題會同我哋講，特別感情問題，成日打返嚟求救，但佢好聽話，同佢分析，自己會處理到。」可見女兒性格相當獨立。鮑姐又表示早前孫兒跌傷撞到頭部，事隔多天痊癒後才報平安。
「16歲前阿女乜都唔使做，有媽媽照顧，我估佢初初去到連水都唔識煲。但離開屋企過去英國，自己慢慢成長，成為一家之主，覺得佢叻過我。」鮑姐引用Emma婆婆的例子，兒子移民日本而大發雷霆，但她覺得作為老人家，要支持和體諒年輕人：「仔女大咗有自己新生活，有佢哋自己新天地，有佢哋嘅生活自己圈子同家庭，我哋只能夠祝褔佢，同埋探訪、默默支持佢。」開明開通的長者，至理名言，讓年輕一代無壓力向外闖，自己也會生活愉快。
攝影：馮凱宜、黃敬博
撰文：王連連
U Lifestyle App自家節目登錄《U TV》專區！
↓↓試玩、試食、試用影片任您睇↓↓
【立即體驗】