入行逾50年︳羅樂林自評演佳視版楊過最失敗 做大龍生靠誇張過火吸引觀眾

74歲的羅樂林入行超過50年，曾先後效力佳視、亞視及無綫三間電視台，當中在佳視的代表作，是同李通明合演的《神鵰俠侶》，成為香港電視史上首位楊過。轉投無綫後旗下亦有佳作，在劇集《大時代》飾演的「股神」葉天，及人氣處境劇《愛回家之開心速遞》的大龍生，皆令劇迷留下深刻印象。羅樂林今次接受港台《一起走過》主持人楊紹鴻、文頌嫻訪問，分享當年獲邀做楊過的經過，亦有講近年工作心態。

同場加映：美麗戰場丨劉佩玥唔認嘈圈中揀朋友要挑剔 陳曉華忽略閨密喊住道歉挽回

{{hket:ul-video id="6812"}}{{/hket:ul-video}}

{{hket:inline-image name="facebook202210191731.jpg"}}{{/hket:inline-image}}

{{hket:inline-image name="2p33000234173691qqrs_600_600.jpg"}}{{/hket:inline-image}}

羅樂林出道時以拍電影為主，電影公司後來倒閉，經朋友介紹入電視台，在1975年佳視版本《射鵰英雄傳》內飾演丐幫長老魯有腳，之後被睇中成為香港電視史上首位楊過，他說：「嗰時有人推薦入去做一個丐幫角色叫做魯有腳，拍完啲人覺得一個靚仔可以做到呢個角色。唔知點解細個時唔鍾意睇小生啲戲，嗰個年代都係睇老生嘅戲多。雖然我年紀唔係好大，我已經可以黐鬚演劍仙之類角色，而家啲人都成日笑我冇鬚就做唔到戲，我算係黐鬚最多嘅一個演員。」

新冠入侵《愛．回家》︳73歲大龍生羅樂林初步確診 快測「陰濕」陽性險烏龍走漏眼【下一頁】

由於演出令人意想不到，佳視之後開拍《神鵰俠侶》就搵羅樂林去試鏡，「佢哋搵咗5個演員去試鏡，去到現場就畀張紙你演，但唔使化古裝個妝，記得馮淬帆、蕭笙叔同好多導演喺控制室睇我哋。（試鏡驚唔驚？）都冇得驚，因為你入到嚟都要硬住頭皮去，其實我當時廣東話唔得，我本身係潮州人，但潮州話、國話又講得唔好，樣樣識啲但就講得唔好。（正式孭飛做主角就識驚？）直情驚到不得了，講真入行50幾年到而家，演得最唔好就係楊過，劇情差唔多場場有份，一個咁新嘅人去做60集，廣東話唔叻又擔咁重戲。雖然細路仔時學泰拳，但拍打戲又係另一樣嘢，完全唔識技巧，而家諗番係好夾硬。（當年劇集反應如何？）嗰時有上齣《射鵰》米雪佢哋嘅效應，又剛興起武俠劇，令好多人睇到好瘋狂，雖然我演得唔好，但好多人睇。」

羅樂林回憶拍《神鵰》獲益良多，有幸遇上梁小龍及多位打得之人，「佢哋喺表演上嘅打，全部都好熟練，過程中喺梁小龍身上學到好多嘢，見到佢動作速度又快，打出嚟又瀟灑，令我開始明白武打在戲劇上表演係要咁樣。（往後一直做男主角？）都算係，喺佳視年代好少拍時裝，之後拍《紅樓夢》、《白髮魔女傳》、《仙鶴神針》同《雪山飛狐》……到拍拍吓《風雷第一刀》就佳視執笠。」

《愛回家》羅樂林72歲生日「尋寶圖」慶祝 大合照見到佢一身打扮再劇透？【下一頁】

對於現時在《愛回家》飾演大龍生，角色明顯跟過往不同，羅樂林說：「我演喜劇唔算多，之前都有拍處鏡劇《誰家灶頭無煙火》，所以接呢套時都開心。珍姐（曾勵珍）有呢個機會畀我，都估唔到呢部拍咗5、6年。（拍攝前有想過如何演繹？）基本上要誇張啲，處鏡劇永遠係過火好過唔夠，同埋呢個角色係一言堂，總之我話乜就乜；而家成班仔女、演員都好叻，知道keep住角色嘅性格，個個都做得好好。」

（↓點擊放大睇圖片↓）

追問有否計劃退休？他話：「到今時今日冇諗呢樣嘢，退休談何容易，身體老時要諗面對各樣醫療，我比較信每個人要做好自己本分……好多嘢係大家估唔到，今日可能好哋哋，突然之間唔知自己會點，我覺得唔好去諗咁多嘢，最緊要自己接到工作，保持狀態做好自己工作，你一定要做到最好……可能去到一個年紀，你可能覺得好，第二個人會覺得你差啲，睇住個演員已好盡力，你唔會去怪佢，你見到佢喺度hea，咁就唔得嘞，我唔會諗太長遠嘅嘢。」

撰文：梁榮達

U Lifestyle App自家節目登錄《U TV》專區！

↓↓試玩、試食、試用影片任您睇↓↓

【立即體驗】