梅艷芳母登報與梅啟明斷絕關係 「此後一切華洋轇轕均與本人無關」

現年98歲嘅已故天后梅艷芳媽媽梅覃美金同佢嘅大仔梅啟明，去年底因電影《梅艷芳》嘅訴訟而鬧不和，梅媽曾揚言如果阿仔一意孤行提告就會同佢斷絕關係。梅媽講得出做得到，今日登報與梅啟明脫離母子關係！

相關新聞：告《梅艷芳》電影侵犯商標│梅啟明懶理梅媽斷絕關係照提告 「我做嘢使唔使同大家交代？」

梅媽原有4名子女，其中3位包括天后梅艷芳，廿幾年間子女相繼因癌病離世，剩下長子梅啟明。兩母子多年來多次為梅艷芳的遺產分配方案提出法律訴訟，梅媽無論點都力撐阿仔；而梅媽每月從女兒遺產中獲得20萬元生活費都會供養埋梅啟明一家，梅啟明都因此被外界戲謔為「遺產界KOL」。

同場加映：After Class聲夢四小花感情好零拗撬 與COLLAR風格各異望互相學習

{{hket:ul-video id="5280"}}{{/hket:ul-video}}

但二人去年底關係開始轉差，梅啟明入稟高院控告製作電影《梅艷芳》的安樂影片涉嫌侵權，梅媽直斥阿仔財迷心竅，並發聲明表明從未參與入稟事宜，更自爆半年前已對兒子「閂水喉」，直鬧佢係「打壞」、「躝癱」，拒絕阿仔到醫院探望。梅媽早於去年12月就向梅啟明下最後通牒，指如果阿仔唔撤銷訴訟，就會同佢脫離母子關係，希望佢唔好再咬住唔放，以後生性做人。

{{hket:inline-image name="800_dc347bdefd0a0a9aac7e9e6846eee77csaasftp20200221_600.jpg"}}{{/hket:inline-image}}

梅媽事隔2個月真係正式登報脫離關係，詳文如下：「本人梅覃美金與兒子梅啟明脫離母子關係，此後梅啟明在外一切華洋轇轕均與本人無關。」梅媽無奈表示阿仔喺出面爭到周身債，逼到佢無路可走，同時梅媽就話唔知佢點解爭人錢，亦唔知佢爭人幾多錢。據知梅啟明之前多次因欠債而向梅媽「攤大手板」，梅媽有感已無能為力。抱恙多時嘅梅媽正係喺醫院休養。

梅啟明對於梅媽登報脫離母子關係表示：「佢老人家鍾意點就點！」佢指欠債全因梅媽要求孫兒由馬來西亞返港過年，梅啟明指阿仔返香港要喺酒店隔離21日，樣樣都要使錢，但亦只係幾萬蚊，「係要解決酒店錢啫，搞咁多嘢做乜！」又話自己經濟有困難，有做散工但收入不唔高，「我貴庚吖？搵得幾多！疫情又要扣人工，借都借唔到咁多。」梅啟明指梅媽行到呢步全因身邊人及親戚挑撥，「佢當我係仇人，我心死。我冇生存希望，佢鐵石心腸，難聽啲講，我都嗰頭近，我一定走得快過佢。」梅啟明指過年前梅媽已留喺醫院避見，亦唔肯聽佢電話。

撰文：黃蘊姿