十月初五的月光｜姚嘉妮恨見「萬朱莎華」陳曼娜 擔心角色太衰 擬去泰國避風頭

姚嘉妮於台慶劇《十月初五的月光》中飾演萬朱莎華，同舊版本由陳曼娜飾演的一樣乞人憎，睇到觀眾好鬼激氣！劇中，姚嘉妮不時同媽媽Q姨（米雪飾）吵架外，又逼到海景叔（石修飾）要斟茶認錯，同時阻止兒子沛堅（伍富橋飾）同海琳（林穎彤飾）結婚，最終新娘變成曼玲（阮嘉敏飾）……萬朱莎華劣行一個接一個，真的擔心姚嘉妮出街時會被人指住鬧。

{{hket:ul-video id="4873"}}{{/hket:ul-video}}

{{hket:inline-image name="IMG_2896.JPG"}}{{/hket:inline-image}}

{{hket:inline-image name="12102005.jpg"}}{{/hket:inline-image}}

姚嘉妮這日接受《晴報》訪問，表示劇集出街之前已經很擔心，就是Manna姐（陳曼娜）在2000年的演出，口碑太好令人感壓力，她說︰「開拍前監製（陳志江）話畀個重要角色我做，有句精警對白就係『我萬朱莎華就最講道理嘅』……我以前有睇過齣劇，但係已經唔記得咗啲情節。到齣劇就嚟播時候，坊間好多輿論，嗰時先發現Manna姐原來好深入民心，觀眾好記得佢嘅對白同情節……佢原來咁勁，嗰時我真係有壓力。之前我只係希望觀眾接受（我嘅演出），就係咁簡單，但係而家觀眾係鍾意，我真係好開心，似一份Bonus。（有冇諗過打電話畀Manna姐？）直頭想見佢！同佢影相！好想兩個萬朱莎華一齊，但我冇佢電話，或者你哋幫我問吓可唔可以。而家齣劇出咗街咁多人講，我好想好想搵Manna姐出嚟，同佢食餐飯，多謝佢演繹出一個咁犀利嘅角色。」

十月初五的月光│莎華報復君好要海景叔斟茶認錯 姚嘉妮演出衰到爆 觀眾睇到嬲【下一頁】

提到劇中行為乞人憎，出街時有否被觀眾鬧？姚嘉妮笑說：「可能而家戴口罩出街，去街市都唔會認到你，冇人喺街真係指住我鬧。不過網民有好多留言，成日講好憎我，話我噚日（劇情）好衰；同時都會加多句讚賞，話我做得好好，真係好鍾意之類；觀眾對我又愛又恨，憎我但又睇得肉緊。我角色真係好衰，叫修哥（石修）斟茶畀我，我又唔畀個仔結婚，做咗好多衰嘢出嚟；有講笑話如果通關，我可以飛去泰國避一避風頭先！」

（↓點擊圖片放大↓）

姚嘉妮在戲內如此霸道專橫，現實中有否禁止自己仔女睇這齣劇？她說：「佢哋冇特別想睇我啲劇，不嬲都唔想睇，唔覺得媽咪係藝人，要演戲。有時我睇緊劇時，佢哋經過會話『媽咪你又鬧人』，哈哈哈！仲話我場場都鬧人。（現實好少鬧仔女？）唔會鬧，我亦唔係怪獸媽咪，成日又攬又錫佢哋就真，好似我需要佢哋多過佢哋需要我咁，我仲係成日攬、成同錫我12歲嘅女，有時會走上佢張床唔肯走；我覺得攬攬係好重要，要有身體接觸，若果而家唔做，我百年歸老時，仔女就唔會走埋嚟攬吓我、錫吓我。可能老一輩無咩身體接觸，距離感好遠。當然仔女犯好大錯都會鬧，但鬧完自己又會匿埋一邊心痛，唉……（唔會似萬朱莎華咁專制？）專制係一定要做運動，每個禮拜都要做，好緊張佢哋身體，要健康，要發育得好，呢樣無得傾！」

撰文：梁榮達

服裝：111 korean fashion、more

U Lifestyle App自家節目登錄《U TV》專區！

↓↓試玩、試食、試用影片任您睇↓↓

【立即體驗】 

{{hket:inline-image name="af67c90a-3b52-4522-9e3d-e5d0b6987ef3_600.jpg"}}{{/hket:inline-image}}

{{hket:inline-image name="8b77edc5-7914-4c3f-bbb1-1faaffd3a3cc_600.jpg"}}{{/hket:inline-image}}

{{hket:inline-image name="e4356b4d-c11e-41a6-bdd9-a9e3ca2efe9d_600.jpg"}}{{/hket:inline-image}}