譚仔25周年 義賣「譚仔遮遮」行善

譚仔雲南米線（譚仔）今年踏入25周年，黛安聽公關姊妹講，譚仔同香港藝術中心、協康會、6個本地插畫師創作單位，以及國際揚名嘅90後攝影師千紅合作，本月11日至16日將推出6款「譚仔遮遮」，透過慈善義賣幫助更多有需要嘅人！

「譚仔遮遮」畫咗6條深水埗必到路綫圖，非常精緻，只要喺上述日子到指定譚仔分店，惠顧任何堂食或外賣自取，用$60即可換購「譚仔遮遮」縮骨遮1把，所得收益不扣除成本，將全數捐畀香港藝術中心和協康會。另外，譚仔近日從1,300多名「譚仔姐姐」中，挑選6位組成「譚仔女聲合唱團」，除咗以新女團身份推出新歌外，早前更由千紅操刀，幫佢哋影咗輯靚相。如果想睇呢班姐姐嘅英姿，下周四（11日）至30日可到香港藝術中心4樓舉行嘅《譚仔‧姐‧遮》攝影展，免費入場㗎。