卡樂B新推煙燻芝士味粟一燒 9款人氣粟一燒換新裝

平日工作咁忙，返工要準備啲零食提提神，卡樂B粟一燒系列向來係黛安嘅首選。公關姊妹話，粟一燒最近以全新形象回歸，連同最新推出嘅「煙燻芝士味粟一燒」在內，共有9款粟一燒換咗新裝，包括「燒烤味粟一燒」、「香辣味粟一燒」，仲有上湯龍蝦味、粟米濃湯味、蒲燒鰻魚味、炭燒蜜糖雞味、炒蒜味及麻辣味，每款配搭獨特顏色包裝，令人眼前一亮。

姊妹話，芝士迷絕對唔可以錯過新出嘅「煙燻芝士味粟一燒」，當中芝士中有陣陣熏木嘅香氣，提升味道層次，只要打開包裝就聞到濃郁芝士香氣，食落仲會滲出獨特嘅煙熏味，一試難忘！而家9款新包裝粟一燒喺各大超市、便利店及零售店有售，黛安都要去買定幾包，放喺公司同屋企慢慢歎。