奧海城「香港體育紀行展」 啟迪港人發揮運動員精神

香港運動員嘅奮鬥故事，每一幕都感動人心。日前公關姊妹帶黛安去奧海城參觀「志氣凌雲--香港體育紀行展」，呢個展覽係由團結香港基金及香港地方志中心主辦，並由信和集團贊助，展期至10月3日。展覽有好多珍貴圖片，睇到本地運動員多年來喺國際重要賽事贏得嘅驕人成績，同埋介紹運動員嘅勵志故事，希望啟發同鼓勵港人發揮運動員嘅奮發精神。

場內仲特設多項運動互動體驗遊戲區，市民可以免費參加，例如劍擊互動體驗區，可讓大家認識劍擊同體驗劍擊樂趣。此外，場館亦有多個創意打卡裝置，包括「幻視藝術拍照區」，影到好似「親身」同奧運女飛魚何詩蓓及蘇樺偉同場較勁咁，好得意㗎。另外，商場嚟緊嘅日子仲邀請咗多位香港運動員出席分享會或見面會，例如羽毛球「一哥」伍家朗及東京殘奧銅牌得主陳浩源，就會喺9月26日出席首個「擊拍」見面會，同大家近距離接觸，粉絲記得去捧場呀！

展覽詳情

日期︰即日起至10月3日

時間︰中午12時至晚上9時

地點︰奧海城2期地下主題中庭