恒地7大商場消費券升級獎賞 買滿$5000隨時回贈$500

黛安正在計劃下個月收到電子消費券後去邊度掃貨，啱啱聽到公關姊妹講，恒基地產旗下7大商場將於8月1日推出「消費券升級二重浪」，H‧COINS會員當日起至12月底，喺指定7大商場累積消費滿$5,000或以上，即有機會賺取總值$500回贈獎賞！

公關姊妹話，會員只要用消費券指定4大電子平台消費，並成功登記商戶機印發票同相符嘅電子交易存根，每次累積消費滿$1,000，可獲$30餐飲電子禮券及$30購物電子禮券各一張，每人最多可換5次；如果換齊5次禮券，更有機會換到$100餐飲電子禮券同$100購物電子禮券各一張，姊妹話所有回贈獎賞名額有限，先到先得，想早啲換禮券，記得早啲去掃貨喇！