荷里活廣場 Pokémon夏日運動祭

想同小朋友一齊開心放暑假？黛安收到風，鑽石山荷里活廣場由即日起至8月31日會舉辦「Pokémon夏日運動祭」，皮卡丘、伊布、小火龍等人氣寶可夢，同大家一齊玩鬥智鬥力遊戲。

公關姊妹話，場內除咗有「POKÉMON AIR打卡玩樂天地」同3大Pokémon打卡位外，同步登場嘅仲有「寶可夢卡牌珍藏展」，展出逾500張寶可夢集換式遊戲卡牌，包括「噴火龍VMAX（HR）」等。本月底全新s7系列牌組（摩天巔峰，蒼空烈流）亦會強勢登場，展出逾200張全新寶可夢卡牌s7系列卡牌，粉絲絕對唔可以錯過呀。

另外，商場會定期舉辦「寶可夢集換式卡牌教學班」，8月底仲有「荷里活廣場寶可夢卡牌錦標賽」競逐勝者之位㖭，想知道教學班同比賽詳情，就要密切留意喇。同場特設「Pokémon商品店」，售賣多款由日本Pokémon Center直送嘅精品。