葵興life@KCC親子瑜伽工作坊 強身又促進親子感情

疫情下小朋友成日困喺屋企，連家長嘅壓力都倍增。黛安收到風，位於葵興嘅活化工廈life@KCC，近排開放空中花園Green@KCC，仲特意邀請專業導師舉辦「周末親子瑜伽工作坊」，即日起至6月20日，只要到life@KCC同joy@KCC指定商戶，以電子貨幣消費滿$300或以上，即有機會免費參加工作坊！

工作坊分別喺今個月29日、6月5日、12日同20日舉行，每日有兩場，每節1小時。家長可以帶同3至8歲嘅小朋友參加，周末黃昏陪住小朋友喺戶外伸展肌肉，挑戰平衡力。親子瑜伽導師Chantal Lam話，親子瑜伽有助糾正小朋友日常因錯誤姿勢而造成嘅問題，令佢哋骨架可以更健康成長，過程中仲會加入遊戲元素，令親子之間建立信任同親密度，令關係更融洽和諧。

活動既可強身又可打卡，仲可以促進親子感情，為小朋友體力放電，兼為心靈充電，可謂一舉多得。名額有限，換完即止㗎，大家快啲行動啦。