香港設計中心「後‧生」設計展 致敬未來的我們

黛安同朋友不時都會相約去睇下展覽，好姊妹話畀黛安知，香港設計中心同「設計光譜」合辦嘅設計展覽「後‧生」，策劃咗5大站點，每站都採用咗嶄新、富童真、具玩味嘅互動形式設計，參觀人士可以體驗長者生活嘅挑戰之餘，亦可以欣賞銀髮族前輩劃時代嘅優秀設計等，等大家可以同「未來的我們」致敬。

展覽由即日起至7月18日喺「茂蘿街7號」舉行，好姊妹向黛安推介5大主題中嘅第2站，佢話可以睇到10位本地銀髮前輩嘅設計故事，例如出品「李漢港楷」字體膠牌嘅耀華膠片廣告公司、百年木器泗祥號、百年遮廠梁蘇記等，透過展品可以細味呢啲以歲月歷練打造嘅設計故事。

黛安亦知道，即日至5月30日「茂蘿街7號」地下公共空間，仲有本地藝術家組合MUDWORK創作嘅摺凳音樂會「拍枱拍凳」，將大眾熟悉嘅舊式摺枱摺凳變成樂器，注入聲音能量，而虎豹樂圃弦樂團、虎豹樂圃爵士樂及「青協香港敲擊」青年敲擊樂隊等亦會合力演出。聽講仲有工作坊及10場免費導賞團，節目好多元化。詳情可【按此】瀏覽。