大自然觀察｜「咕姑固」夫婦冷氣機築愛巢生蛋 暖心港男見證BB長大：就嚟飛走唔捨得

隨著天氣轉熱，相信不少人清晨時都會被「咕姑固」的叫聲吵醒。一名港男在網上分享一對珠頸斑鳩夫婦前來築巢生蛋的過程，指隨著時間過去，只見兩隻BB日漸長大，一家四口在其冷氣機散熱器後平靜生活，未有發出「咕姑固」的噪音。一直觀察BB成長的事主更表示：「佢哋就嚟要走，有啲唔捨得……」

該名港男周二（11日）在網上討論區「連登」以「[突發] 有隻雀響我屋企出邊築巢」為題發帖，指兩星期前，有一對雀鳥飛到其家的冷氣機散熱器後築巢生蛋，

「有一日打開隻窗，見到隻雀瞓咗喺度，以為佢瓜咗。但係好似已經有個巢，仲有兩隻蛋，所以我就無刻意搞佢。」

（↓點擊圖片放大↓） 

自此，事主便時刻觀察一對雀鳥及鳥蛋的情況，而鳥蛋亦孵出兩隻BB，十分可愛；為免「破壞人哋生態系統」，事主未有餵食、騷擾，一直只作遠距離觀察。日子一久，他更能分辨出該對雀鳥夫婦，並摸清牠們輪更育兒的時間，

「一隻紅色啲，一隻灰色啲……有時見到佢哋轉更，老竇轉老母、老母轉老竇。」

起初事主並不知道雀鳥品種，後獲網民告知雀鳥為「珠頸斑鳩」。隨著兩星期過去，兩隻BB羽翼漸長，牠們不時靜靜的等待爸爸、媽媽獵食歸來，「啲BB仔已經大咗好多……可能佢哋就嚟要走，有啲唔捨得。」雖然有網民表示應該尚有兩星期左右，兩隻BB便會長大飛走，但事主昨日（13日）傍晚發現其中一隻BB疑似飛走不見，至今日中午仍然只剩下一隻BB獨自在巢中呆企，

「另一隻已經飛走咗，我驚佢唔識起飛！」

（↓點擊圖片放大↓）  

帖文吸引大批網民與事主留言互動，有不少人大讚事主有愛心；但有過來人提醒事主小心被雀鳥影響環境、甚至屋內的衛生，「以前屋企有過一樣情況，個巢安全嘅話養大咗啲雀B（識飛走）之後會再繼續返嚟生。但係以前部冷氣機係入窗式，養咗3代之後發現勁多蟲仔定蚤經個巢入屋，跟住等最後一批B大晒之後屋企人就拆咗佢個巢。」

對此，事主表示他會在珠頸斑鳩一家四口飛走後，清理冷氣機散熱器後的鳥巢及雀屎。而對於有網民表示「風水佬話屋企氣牆好先會有（雀鳥飛來築巢），係好事嚟」，事主笑言：

「認真佢嚟咗之後都幾好運！」

鳥雀專家：待幼雀孵化成長便會離開

早前曾有市民發現珠頸斑鳩在冷氣機旁築巢後，竟以棍棒驅趕，2隻蛋被掃落街跌碎。觀鳥會高級保育主任胡明川接受《晴報》訪問時表示，此事是不能接受，「人類同大自然嘅關係唔應該係咁，其實仲有好多方法去遷就、處理，可以諗吓點樣共處」。她認為，如果遇上同類事件是一件有趣的事，

「其實唔需要干擾到佢哋，各有各空間，又可以隔住玻璃觀察孵化、雀仔長大、飛走嘅過程，set cam又可以記錄低。」

她指出，雀鳥在住宅大廈窗台、冷氣機罅隙築巢均較為常見，視乎不同品種，一般約1至3個月後，待幼雀孵化成長便會離開，希望各受影響的戶主忍耐至繁殖期後才拆巢處理；如果不希望雀鳥來繁殖，其實是可以及早預防，例如是將已停止使用的抽氣孔封好等，而非待雀鳥正在繁殖時才干擾牠，或把牠趕走。

她又指，隨著天氣和暖，或會有更多雀鳥繁殖，希望各位市民可以手下留情。一般雀鳥需要身體健康才可繁殖，加上如窗戶緊閉，其實已可避免與雀鳥直接接觸，人類透過接觸雀鳥直接感染傳染病的機會並不高，市民無需過慮。

等多10日就孵化！斑鳩窗罅築巢生蛋，絕情鄰居一棍掃落街，詳情即睇：【下一頁】

U Lifestyle App自家節目登錄《U TV》專區！

↓↓試玩、試食、試用影片任您睇↓↓

【立即體驗】 

每朝索取《晴報》：精明生活．健康家庭．開心娛樂

責任編輯：李凱晴