蠟筆小新回力車第2彈 明起7-Eleven換購

黛安收到風，7-Eleven聯乘《蠟筆小新》嘅積木精品已來到第2彈，今次推出嘅限量回力車系列共有3款，今個星期三（12日）正式登陸7-Eleven，粉絲快啲去換購啦！

公關姊妹話，3款回力車各有特色，造型有趣可愛，玩上去相當過癮，換齊全套就可以將家中變成小型賽車場，大人同小朋友一樣咁鍾意。除咗有回力效果同可活動組件外，每款回力車仲附有2款貼紙，可以幫車仔換新裝，營造唔同情景。

即日起至6月8日去7-Eleven分店買滿20元即可獲1個印花，其後每10元就多1個，今個星期三（12日）至6月11日，儲齊6個印花加40元，就可換購1款小新回力車。yuu會員喺本月12日及13日限時兩日，仲可以7,000yuu積分加5元換購㖭。