「又要返工喇！」5日長假過去，一眾打工仔重回辦公室，唔知有冇覺得周身唔妥？眼瞓、唔想做嘢、集中唔到兼有點鬱悶？如果中咗大部分，即表示你已患上「長假後候群症」！想知點擺脫以上症狀？即刻睇埋落去：
病徵1：疲倦失眠
雖然冇得去旅行，但假日唔多唔少都會夜瞓、遲起身，打亂咗生活規律，導致一要返工就失眠同睡眠紊亂。
解決方法：
上班時若想提神，可適量補充維他命B雜，市面上一些含有維他命B群的補充劑卡路里少，而且不含糖分，可助人消除疲勞和醒腦。下班後，睡前用熱水泡腳10分鐘，或飲熱牛奶都有助安眠。
▲放假容易打亂作息規律，以致上班前一日失眠。
病徵2：煩躁不安
連續幾日假期後返工，又要迫車又大把嘢等住做，但效率未能跟上，自然煩燥加壓力大。
解決方法：
先整理好個人思緒，不必急於完成所有工作，循序漸進地調節好工作步伐。另外，可飲用一些合適自己體質的花茶或茶飲，以安撫身心。
▲好多嘢等住做？唔好一味急，飲啖茶放鬆吓先。
病徵3：胃口欠佳
放假唔少得同親朋好友食大餐，但放縱飲食除了容易引起消化不良，亦可能令人自責食得太多，導致心理上出現厭食的症狀。
解決方法：
若是大飲大食後的腸胃不適，可選擇一些養胃的食物，包括秋葵、椰菜和木瓜；如沒有食欲，則可選擇一些酸甜的食物，如山楂和蕃茄，並可進食乳酪、水果和補充維他命C。
▲工作時工作，休息時休息，放假可找朋友作伴，並進行一些戶外活動。
病徵4：心神不寧
平日習慣於忙碌和高壓，放假又突然好像無所事事，返回工作崗位後又重新忙碌起來，可能會導致心理失衡，造成情緒失調。
解決方法：
無論返工定放假，人都係習慣的動物，保持有規律的生活可以將注意力放在該做的事情上。此外，多做運動如慢跑、跳舞等，亦有助減壓和調節身心。
唔想重蹈覆轍？下次放長假時，盡量避免日日大魚大肉；上班前一天可做點運動，避免因焦慮而失眠，瞓返個靚覺再搏鬥！
圖片來源：《金秘書為何那樣》劇照
編輯：梁銚玶
接收全方位穩健財富管理資訊，請讚好「健康財富 Wealthy Life」Facebook：https://fb.com/Wealthylifehk/