【煤氣費貴】點解呢個月煤氣費特別貴？要定時自己報錶？一文解答用煤氣疑問（上）

網上周不時都有唔少人討論煤氣費，通常都係問點解突然收貴咁多，尤其疫情下用量靠估，張單用量同煤氣錶可能唔同。不過用得煤氣（主要係指熱水爐）就預咗貴，但如果唔清楚煤氣公司點收費，用戶又一直唔睇吓個錶，好可能一直畀多咗都唔知。今次就列出煤氣用戶最常問同最易忽略嘅問題。睇完包你明晒，可能仲慳返唔少添！

Q1：知唔知張煤氣單收緊你乜嘢錢？

A：要知道煤氣費點解咁費，第一件事要知煤氣單收嘅究竟係咩錢，如果無分期買爐具，通常只有兩筆錢。第一筆係「煤氣費」，包括「煤氣標準收費+燃料調整費」，煤氣標準收費係睇每月用量而定，可以睇煤氣網頁＞按此＜，而燃料調整費係根據石腦油（應該係煤氣嘅原料掛）價格而變動，可以個個月都唔同。

至於第二筆就係「保養費」，而家每月收$9.5。有唔少人問點解要收，事實係你絕對有賺。而家每月唔使10蚊，就可以無限次Call煤氣師傅上門檢查同維修個爐，你試吓出去搵個師傅上門檢查，最少都收你一兩舊，如果要維修，零件費另計，所以呢9個半保養費堅係抵畀。

{{hket:inline-image name="0318WLfeaturepage859.jpg"}}{{/hket:inline-image}}

Q2：日日都係咁沖涼，點解冬天煤氣費特別貴？

A：答案係就算沖涼次數同時間無乜分別，冬天一定比夏天用得多煤氣。主要原因係冬天條入水喉入便嘅水，溫度會低過夏天唔少，需要用更多煤氣來加熱到指定溫度，舉例：

冬天氣溫12°C
水溫約12°C ＞ 較37°C的熱水 = 需要加熱25°C

夏天室溫25°C
水溫約25°C ＞ 較37°C的熱水 = 需要加熱12°C

要令水溫升25°C要用嘅煤氣，一定會比升12°C用得多，升嘅溫度多一倍，用嘅煤氣一般要多50%至70%，而且煤氣熱水源源不絕，一般人冬天沖涼應該耐少少，水溫亦會較高幾度，所以冬天最凍嗰兩、三個月，煤氣費就算收多一倍都可以理解。

Q3：用唔同款式嘅熱水爐，煤氣收費有無分別？

A：絕對係有好大分別！出水量高嘅熱水爐，煤氣一定會用多啲。煤氣熱水爐係即熱式的，即係話每分鐘會出水若干公升，舉例用緊隻20公升嘅熱水爐，咁每分鐘就會出水20公升，如果用緊隻10公升既熱水爐，即每分鐘出水10公升。其實如果唔係有特別大需求，一般住宅其實用唔著太高出水量嘅款式，但如果買樓時已有就無辦法喇，毋為無問題好少會特登更換，因為煤氣爐價錢都唔平。

關於個熱水爐，仲有一點要留意，就係係咪用緊有pre-heat功能嘅款式，呢類通常有個掣寫明pre-heat。呢個button只要著住，即使唔係用緊熱水，佢都會幫你用煤氣熱住嘅水，畀你隨時使用。而家煤氣爐一般都係即熱式，一開好快就有熱水，除非錢多又或者隨樓附送，一般住家買呢種熱水爐真係多鬼餘。

今次講住咁多先，下次講點解報錶可以慳到煤氣費。

編輯：唐婉琦

接收全方位穩健財富管理資訊，請讚好「健康財富 Wealthy Life」Facebook：https://fb.com/Wealthylifehk/