樂富商場開放3萬呎場地 任玩8大新興運動

疫情令大家更加關注健康，黛安都多咗做運動，最近聽到領展旗下樂富廣場嘅戶外休憩用地，會開放畀大家免費借用場地和運動用品，更加入8大新興運動，包括芬蘭木柱、國皇棋、滾球等，大家可以隨時做運動，強身健體。

公關姊妹話，呢個休憩用地佔地逾3萬呎，劃分3大運動區域，包括草地區、球網區和平地區。今個星期六（20日）至4月25日嘅周末同公眾假期，廣場會舉辦「Urban Retreat綠運會」，現場會有專業教練介紹新興運動玩法，可免費試玩，仲可以喺教練指導下提升技術。依家只要喺樂富廣場以電子貨幣累積淨消費額滿$600或以上，就可預約參加綠運會，仲可以參加「都市農莊導賞團」和「創意彩繪盆栽工作坊」㖭。