7-Eleven無奶甜品 素食和乳品敏感人士有口福

以往素食人士要搵啱食嘅甜品唔易，公關姊妹同黛安講，近期推出唔少素食新產品嘅7-Eleven，將推出兩款Green Common嘅「無奶冰凍甜點」，今個月底前每杯試食價只係$25，素食者或對乳製品敏感嘅人都啱食㗎。

兩款甜品分別係「窩心朱古力」同「醇之抹茶」，前者選用含獨特熱帶水果同奶油糖香味嘅泰國單品巧克力製成；後者就用咗優質嘅日本宇治抹茶粉，茶味香醇又清新。兩款產品都用即日製造嘅100%純植物奶製成，加埋椰奶同堅果奶做基底，口感好似牛奶雪糕咁軟滑。更重要嘅係，卡路里不多於120，加上不含膽固醇同反式脂肪，食多幾杯都得啦。

另外，黛安仲收到風，7-SELECT即日會推出多款芝士口味食品，例如「超級芝士餐肉沖繩飯糰」、「超級芝士牛肉拌飯韓式手卷」同「三重芝士醬油飯糰」等，每款都「芝」味十足。鍾意食香口食物嘅，就要試下用南乳、花雕酒同洋蔥粉醃製嘅「南乳燒雞髀」，鹹香惹味，令人想再三回味！7-Eleven咁多好嘢食，黛安都要去掃定貨先得！