靚聲王丨張偉文過年前連人帶輪椅跌倒受傷 初六紅噹噹精神爽利拜年報平安

六十多歲嘅實力歌手「靚聲王」張偉文，由1980年代至今獲得大量歌迷支持。2015年張偉文健康出現問題，早前更連人帶輪椅跌倒受傷，令人非常擔憂，不過今日 (2月17日) 佢就趁年初六同大家拜年兼「報平安」！

{{hket:inline-image name="463dfd22fd66488b0bd33ee91ff8f32b.jpg"}}{{/hket:inline-image}}

張偉文近年身體飽受腰患、糖尿病及腳痛問題困擾，5年前在港演出時，背部一直疼痛，2016年底要進行大手術，從260磅暴跌到變160磅。雙腳乏力要坐輪椅代步，佢當時曾接受本報訪問，「做完手術，之後不小心反了車，反了兩次輪椅，幸好整個人沒有飛出去。」他於2016至18年間先後動了兩次腰椎大手術。

長居深圳嘅張偉文因疫情返港入住酒店，不慎於洗手間跌親斷腳，入醫院住咗幾個星期。去年網上流傳一張張偉文嘅照片，佢坐住電動輪椅，雙腿非常瘦削，唔少人都話差啲認唔到佢，非常擔心。不過張偉文嘅朋友蔡國熙強調佢仍然「好精神好清醒」，賈思樂亦曾約張偉文見面，話對方把聲依然好靚，叫大家唔使咁擔心。

（↓點擊圖片放大↓）

不過喺過年前，張偉文喺佢所住嘅護老院樓下，連人帶輪椅跌倒受傷，隨即被送往醫院救治。張偉文接受傳媒訪問時表示，因為輪椅行得唔順，不慎連人帶輪椅打筋斗跌倒，指自己右背有啲痠痛，慶幸冇大礙。

今日張偉文所屬唱片公司在Facebook出post，貼出其最新近照報平安，寫道「Donald張偉文恭祝大家！牛年好運！精神爽利！恭喜恭喜！」相中嘅張偉文著到紅噹噹，雙手作揖，雖然滿面鬍鬚，但精神飽滿，狀態非常好！從來冇諗過退休嘅張偉文相信疫情後就可以復出！