挑戰小丸子角色髮型 「廿一堂」賞你免費食丼飯

《櫻桃小丸子》係好多人嘅童年回憶，小丸子嘅Bob頭、花輪同學嘅長瀏海髮型真係夠晒經典，諗起都覺得可愛。呢套卡通片已經推出超過30年，黛安收到風，日式燒丼專門店「廿一堂」會同小丸子聯乘，即日起至本周日（7日），喺樂富廣場A區嘅新店推出「小丸子理髮廳」，同大家重現經典髮型。

屆時會有一班專業髮型師駐場理髮廳，幫大家免費剪4款櫻桃小丸子角色髮型，包括小丸子嘅「鋸齒蔭」Bob頭、小玉嘅孖辮Look、花輪同學嘅偏分大波浪瀏海、丸美同學嘅超短剷青。「廿一堂」仲話，為獎勵客人勇於挑戰，如果剪完髮後再自拍放上個人社交媒體，就有豐富獎品；挑戰愈難carry嘅髮型，獎品愈大份。如果想同小丸子公仔合照，就要mark實今個星期六、日嘅下午1至3點喇！