SOGO會員計劃革新 最低級免費入即送2000分

崇光百貨又有新搞作，黛安收到風，專屬會員計劃SOGO Rewards將推出全新會籍級別，各位姊妹記得快啲入會，享受購物優惠同埋全新獎賞禮遇，包括超過2,000迎新獎賞積分、生日驚喜等！

全新嘅SOGO Rewards以日本傳統繩結「水引Mizuhiki」作為標誌。聽公關姊妹講，水引象徵人與人之間嘅連結，就好似崇光同顧客關係細水長流一樣。

新會籍將劃分3個主卡會籍級別，同埋1個附屬會籍級別，其中，最高級嘅KIKU菊花金卡會籍，需1年消費滿$60,000先可入會，但優惠最多，如幫襯和三昧日式餐廳，可享9折等。附屬會籍YURI美妍卡就專為貪靚女士而設。