自言自語傻笑被嘲「低低哋」 遭家人嫌棄拒一起過節 30歲男便利店打工5年視避風港

一份微不足道的工作，可能會為人帶來不一樣的溫暖。一名30歲港男在便利店工作5年，因經常自言自語和傻笑，被人嘲笑是「低能仔」；甚至獲家人嫌棄，在大時大節時拒絕一起做節，家人著他不要回家。然而，他視在便利店工作如獲「避風港」，老闆都大為感觸。

Facebook專頁「辦公室日報」上周一（21日）刊登讀者曾女士的投稿，指經營一間便利店5年，期間聘請過很多員工，有學生、主婦、中年轉行，亦有人暫時找不到人生方向，而大多數人都不會「長做」，唯獨一名男職員由便利店開業至今都沒有離職。

曾女士指，該名男職員30歲，化名阿朗，與一般人「有啲啲唔同」，

「例如會成日自己同自己講嘢，無端端自己笑，無法完完整整講出一句說話，而且佢會機械式咁講：『有咩幫到你呀小姐？』就算個客係男性，佢都只會講：『有咩幫到你呀小姐？』」

後來曾女士慢慢發現應該是阿朗太緊張導致，嘗試過幫他和教導他，情況有輕微改善。亦有客人和員工向她反映不滿，甚至指阿朗「低低哋」，惟曾女士不認同。她認為阿朗智力無問題，為他抱不平稱：

「叫佢做嘢由最初不知所措，到後來話頭醒尾，唔使叫都識得自動自覺去做，我感受到呢個男仔其實有下過苦功，只係應對方面比起其他人慢啫」。

便利店工作更自在舒服

不知不覺，阿朗已在便利店工作5年，曾女士考慮到便利店無法給予薪金上太大的升幅，遂問他有沒有打算轉工。阿朗聽後以為曾女士想解僱他，顯得非常慌張，又分享自己在茶餐廳打工時，被老闆和同事叫他「低能仔」，又會捉弄他，甚至當住食客面前責罵他，覺得非常難堪。相比之下，在便利店工作的感覺不同，

「而家喺便利店感覺唔同，除咗收錢，其他時間做好自己嘢就得，起碼應付到，唔使畀人閙，又可以自食其力，覺得好自在同埋好舒服」

弟弟明言不想一起做冬

曾女士又指，早前冬至，有同事想和阿朗調更，但阿朗完全不介意，她其後又勸他回家與家人做節，不過阿朗表示家人不太喜歡自己，其弟弟打算叫女朋友回家吃飯，明言不希望阿朗回家，「驚會影衰晒」。面對家人的態度，阿朗亦沒有埋怨，反而流露出體諒表情，更對曾女士表示：「舖頭暖好多，如果唔係萍姐（其中一個同事）調更，我喺街行仲凍，我鍾意呢度呀。」

曾女士聽後非常感觸，

「我覺得自己間便利店提供唔到好前途畀人，但原來對阿朗嚟講，我呢度係佢嘅大世界，係佢嘅避風港，起碼喺寒冬之下，佢喺舖頭裡面仲覺得溫暖，我第一次覺得自己間便利店唔止純粹係搵錢，原來仲可以幫到人。」

內容獲「辦公室日報」授權刊登。

每朝索取《晴報》：精明生活．健康家庭．娛樂資訊