青衣城商場聖誕飄雪 旋轉城堡如同歐洲馬戲團

今年聖誕節，大家都要乖乖留喺香港度過，黛安聽講青衣城準備咗「聖誕馬戲『風』玩飄雪樂園」主題活動，即日起至明年1月3日，過百隻毛毛熊會帶埋一座6米高嘅旋轉玩具城堡同馬戲團坐鎮商場，除咗可以同班熊仔、雪人、聖誕鹿車等影相，座城堡塔尖仲會定時轉動同變色，好似去咗歐洲嘅馬戲團咁。

另外，今次商場仲邀請由本地初創企業創作團隊喺商場戶外位置打造互動光樂藝術裝置「聽風的森林」，110組光樂藝術裝置布置到好似森林咁，只要有風吹過就會發聲同變色，自認文青嘅黛安又點會錯過呢？公關姊妹仲話，商場每日仲會定時上演聖誕飄雪滙演，聖誕老人更會喺12月指定周末、平安夜同聖誕節巡遊青衣城，同大家影相兼大派驚喜禮物㖭，就算喺室內都可以感受到「白色聖誕」啦！