元創方「慢活‧樂」工作坊 為舊衣物賦予新生命

秋風起，又係幫衣櫃準備轉季嘅時候。黛安有唔少衫褲仲好新淨，丟掉好浪費，最近聽到公關姊妹講，原來元創方（PMQ）搞咗個「慢活‧樂」活動，推出咗唔同工作坊，等大家可以將舊衣物重新製作，為舊物賦予新生命。姊妹就推介由Phenotypsetter搞嘅老牛工作圍裙工作坊，呢個工作坊係畀參加者自備一條舊嘅闊身牛仔褲，喺導師指導下自家製作成新圍裙。熱愛烹飪嘅姊妹，話好期待上完堂後，可以有條靚靚圍裙下廚！

另外，元創坊個活動亦有好多市面上少見嘅工作坊，適合鍾意獨一無二嘅人參加，上完堂仲可以攞走自家製水松杯墊、黃銅香座、花銅戒指等。姊妹仲話，有一個工作坊係做旗袍頸巾，未諗到聖誕節送咩禮物畀女友嘅男士，不妨報名學下，送製成品氹下女友開心。不過，每個工作坊嘅名額都有限，額滿即止，報名就要快手喇。