本地疫情雖略有緩和，但仍未可掉以輕心。教育局局長楊潤雄早前宣布全港學校可按原定計劃9月開學，但就暫停面授課程，初步公布9月底分階段恢復面授課堂，換言之各位學子仍有成個月要繼續「SFH」（Study From Home）！雖然話用zoom遙距上課已經唔係新鮮事，但唔少學子同家長對呢方面可能依然一頭霧水，以下為大家解構5大疑難。
疑難一：須預備平板/電腦開支大增
遙距上課，平板/電腦必不可少，但唔少低收入基層家庭可能無法負擔；部分家庭如果有幾小朋友而又須同一時間上課，就要多過一部平板/電腦，負擔自然又大增。
解決：可申請關愛基金，其中一個項目為「資助清貧中小學生購買流動電腦裝置以實踐電子學習」；部分企業亦與社福機構合作，向有需要的基層家庭捐贈平板電腦，以助佢哋解決困境。另外個別學校亦會有少量手提電腦可供借用。
▲關愛基金其中一個項目為需要遙距上課的家庭提供支援。（來源：關愛基金網站）
疑難二：操作出現問題求助無門
用Zoom上課有時會出現各種技術問題，包括無法連接、有聲無畫、有畫無聲、連綫出現問題等等。
解決：開學前盡早訓練子女熟悉操作，可模擬多次遙距上課過程，盡量減少出現問題嘅機會，萬一出事都可隨機應變。此外亦可配備具sim卡嘅平板或wifi蛋，萬一家中寬頻連線出現問題都有後備數據可用。
▲準備定個wifi蛋，遙距上課有備無患。（來源：互聯網圖片）
疑難三：屋企太舒服無法上課
雖然話係照常上課，但始終隔住個Mon，又無老師睇住；加上屋企太舒適，又多嘢玩，小朋友自然容易心散，難以專心。
解決：盡量安排小朋友回房間書枱前上課，盡量營造穩定的學習環境同位置；切忌隨便搵個位置，例如攤喺床或坐喺梳化上之類太舒適嘅位置上課。
疑難四：面對各種意想不到嘅騷擾
在家上課，往往要面對各種不同程度嘅騷擾，例如家中老人家需要校大聲浪追看劇集、年幼而未上學嘅弟妹吵鬧，樓上樓下進行裝修等。
解決：父母要同家人互相協調，例如請老人家睇電視時收細聲浪；叫小朋友返房避開年幼弟妹吵鬧；必要時可配置具降噪功能嘅耳機。
疑難五：長期用Zoom上堂勢變近視眼
唔少家長已陸續收到學校通知要用Zoom上至少半日，部分甚至要返足全日！（朝8晚3）。雖然有休息同午飯時間，但日日長時間望住個Mon，想唔變大近視就奇！
解決：可考慮幫平板/電腦加上抗藍光的濾片或保護貼，亦可為小朋友添置抗藍光眼鏡護眼。
▲愈嚟愈多家長為小朋友添置抗藍光眼鏡護眼。（來源：互聯網圖片）。
撰文：何本輝
接收全方位穩健財富管理資訊，請讚好「健康財富 Wealthy Life」Facebook：https://fb.com/Wealthylifehk/