【有型嫲嫲】劉美君曬六舊腹肌被網民讚弗爆曾兩度失婚有咩擇偶條件？

娛樂

發佈時間: 2020/08/30

劉美君自去年同沈震軒拍完ViuTV電視劇《好人好姐》之後，好少更新社交平台。

(《好人好姐》電視截圖)

日前佢終於上載新相，相中佢著住運動裝，大騷六舊腹肌，身形弗到爆，而且素顏嘅佢臉色紅潤，皮膚狀況好好。

除咗大曬運動成果，劉美君仲撰文自我鼓勵：「健康的生活方式，永不停止嘗試。努力工作總有回報，沒有最好只有更好。」強調要忍耐、實踐，繼續努力做瑜伽同健身。唔少網民紛紛留言好掛住佢，又讚佢完全唔似擁有一對孫仔、孫女嘅嫲嫲：「美女真美」、「keep得好好，望落仲好後生」、「女強人」、「弗爆呀」等。雖然劉美君已經55歲，不過其實佢依家仍然單身。

(劉美君instagram截圖)

(劉美君instagram圖片)

屈機過TVB 90後花旦揭54歲劉美君凍齡瘦身秘訣詳情即睇：【下一頁】

劉美君好早就結咗婚，喺82年佢就以18歲之齡，嫁咗畀電影導演黃泰來，並育有一對仔女，可惜婚姻只維持10年。過咗幾年，劉美君經林憶蓮介紹，識咗第2任老公，二人婚後移民美國，再誕下一女，可惜佢哋嘅婚姻於6年後亦同樣告終。劉美君曾經接受傳媒訪問，指爸爸年輕時好靚仔，曾有過3段婚姻，令佢對靚仔冇咩信心，覺得靚仔代表冇本心，又認為自己唔配同靚仔一齊。呢種諗法直接影響佢嘅擇偶條件，令佢刻意唔揀靚仔做老公，以為關係會更長久。兩次失婚後，劉美君先發現呢個諗法唔啱。

劉美君從來冇公開講過前夫半句壞話，而係將離婚責任攬晒上身。佢認為兩次離婚都同自己性格問題有關，形容自己係太高要求嘅人，好麻煩，身邊嘅人難以達到佢要求，可能因為咁而感到辛苦。

(劉美君instagram圖片)

曾經劉美君同黃子雄因為一張拖手相面傳出緋聞，但二人原來只係由細識到大嘅好朋友，咁多年都冇一齊過。

(劉美君instagram截圖)

雖然劉美君過往嘅感情路上崎嶇不平，不過佢冇氣餒，單身嘅佢笑言依家仲好多人追。望落畀人一種好強勢嘅感覺嘅佢, 認為自己有女性嘅一面，有內涵，依然吸引到男士。至於擇偶條件，佢認為有幾多錢唔重要，因為佢一向靠自己搵錢。她又指最好係年紀相若，唔可以太低能，身材好，沒肚腩嘅男士，同埋最重要識得遷就佢。