惡劣環境刺激生意頭腦 「疫」向思維下冒起的3類商機

第三波疫症持續，未見平息迹象，營商環境大受打擊。但做生意嘅，幾惡劣嘅環境都一樣搵到商機！事實上喺疫症呢段期間，有唔少科技同行業都乘勢而起。歸納起嚟，大致又可以分為以下3大類：

1. 減少接觸類

減少人與人嘅接觸係抗疫有效方法。數碼港有3間初創公司研發出3款不同用途嘅智能抗疫機械人，以代替人手探熱、預先為前綫環境消毒及自動導航送遞物件等。此外為咗減少病毒經由紙幣同硬幣傳染嘅風險，坊間現時都積極推廣唔同類型嘅行動支付，令使用率大增。而唔少餐廳現時亦已能透過手機即場自助點餐，減少面對面點餐時面對嘅風險。當然唔少得進行遙距上課、開會而大熱嘅各類視訊程式。

2. 遙距經濟類

疫症亦令唔少需要有緊密接觸嘅行業受到影響，例如地產、保險等。以前者為例，唔只買家唔願意去現場睇樓，就連賣家都唔想有人上嚟睇樓，令交易更添困難。唔少地產公司因而推出「VR睇樓」及「視頻睇樓」等服務，務求令買家可隔住個mon安心睇樓。而後者現時有唔少範疇嘅產品已能夠「遙距投保」，令從業員即使未能同客戶見面都能夠維持服務，甚至開到新單。

有唔少行業亦把握咗呢次機會而發掘商機。有做開酒店餐飲嘅食物代工場，留意到市民留家抗疫嘅膳食需要，於是將加工食物轉去零售市場，售賣加熱即食嘅燉湯同手工粵菜菜式，成為疫市大熱。此外，街市亦係疫症嘅高危地點，有唔少網上平台就推出咗各種即煮餸菜包或網上直送各類新鮮素材，務求令你安坐家中都煮到靚餸。

{{hket:inline-image name="0820WLfeaturepageok2.jpg"}}{{/hket:inline-image}}

▲Switch同《Ring Fit》完全食正疫症的timing而爆出。(來源：任天堂)

3. 在家娛樂類

為抗疫而被逼留在家，亦造就咗唔少娛樂產品同商業受惠，其中任天堂Switch，由於《Ring Fit》結合遊戲同運動嘅玩法，正好適合在家抗疫時消閒同健體，加上疫情令生產綫緊張，因而出現供不應求，甚至炒賣。而開發商任天堂市值亦因而增加約5,000億日圓。至於觀看串流影音嘅需求亦大增，其中Netflix喺美國嘅登入人數喺疫症期間就屢創新高，甚至因為流量需求太大而斷綫。

撰文：何本輝

接收全方位穩健財富管理資訊，請讚好「健康財富 Wealthy Life」Facebook：https://fb.com/Wealthylifehk/