《東張西望》主持李旻芳（Lucy）昨日33歲生日，前日她就分享多張自拍照預祝自己生日快樂，不少網民亦留言祝她生日快樂。而Lucy老公黃耀英（Darren）亦在社交網祝她生日快樂，不過就分享了一張Lucy素顏、打喊路嘅絕密合照，不過唔少網民就形容Darren此舉係花式自殺：「玻璃已準備」。
（IG圖片）
（IG圖片）
Lucy po咗多張靚靚自拍照，並留言：「好彩嘅話人生只係過左三分一時間，唔好彩嘅話，可能係二分一，再黑仔啲嘅，大吉利事可能過唔到聽日。所以我嘅座右銘好簡單！『DON’T WORRY! BE HAPPY!』」
（IG圖片）
（IG圖片）
Lucy又話做咗咁多年人，領悟到嘅係：「要保持純正善良嘅心，對人要真誠有禮貌，要樂於助人唔好怕服務別人，做任何事都要盡力而為，唔好嘥別人時間，唔好嘥自己時間，不為慾望而活，不為名利而活，不為金錢而活，不要計較，要活在當下唔好令自己後悔慢慢你就會知足常樂。我嘅生日願望只係希望可以快快樂樂。」
（IG圖片）
而Lucy老公黃耀英（Darren）亦在社交網祝她生日快樂，不過就分享了一張Lucy素顏、打喊路嘅絕密合照，並留言：「生日快樂，我的零死角女神！Happy Birthday to my photogenic wife!(舊相所以冇口罩)」唔少網民形容係花式自殺，笑指他毀了老婆的女神形象。
（IG圖片）
Lucy接受本報訪問時表示在老公出post前都有心理準備：「其實黃耀英一向都風趣，好鍾意玩，哈哈！開頭佢出post之前有預告過我話會出post祝我生日快樂，我都驚驚地架喇。跟住我說服佢畀我望下先出post ，佢就比我選擇，而佢比我揀嘅全部都係我未準備好或者未訓醒嘅相。我最後就揀咗而家佢出咗嘅依一張喇。我揀完之後都以為佢係咁依講下未必會出相，點知第二日起身睇到報道先知佢已經upload咗，所以其實都有心理準備架喇。」
（IG圖片）
Lucy又指網民對照片反應超出預期：「但估唔到網民咁開心係咁留言叫佢跪玻璃，又叫佢訓地下等等。哈哈，都幾好笑。其實我都唔介意出我打喊路嘅生活照～可以介紹比大家認識真正嘅李旻芳都幾好呀，依個先係真正嘅我嘛，鏡頭下我都係要食飯去廁所訓覺打喊路都好正常架！」
兩人在上年結婚。（IG圖片）
問到生日點慶祝時，Lucy就指留在家中：「我哋生日當日全日留左喺屋企抗疫，乜都無做當休息下。而佢喺兩個禮拜前已經生日禮物比我喇，佢送咗北極光比我！佢知道我鍾意望天空睇星星，一早就去訂咗個星途投影機畀我喺睡房睡覺前望住星星訓。我好鍾意呀！佢知道一返貨就即刻衝出去鋪頭買，等唔切想比我享受下，所以就提早送左比我喇！」Darren真係好有老婆心！
喺屋企都可以睇到星空！（圖片：受訪者提供）
好浪漫！（圖片：受訪者提供）
相信Lucy收到呢份禮物一定甜到入心！（圖片：受訪者提供）
而Lucy在疫情期間仍要出去採訪，佢指每次出外景都真帶定好多防疫用品及經常洗手，希望盡量減低風險。「疫情期間要周圍採訪其實都擔心唔嚟，自己加入《東張西望》就係因為想盡量將民生問題同資訊帶比觀眾，等佢哋都可以緊貼時事。講真病毒無處不在，就算留喺屋企都唔係百分百肯定唔會受感染！最重要嘅係自己點樣把關，所以我每次外景都真係帶定晒好多防疫用品，同埋真係經常洗手洗手洗手，希望盡量減低風險。」
相關新聞：【不離不棄】李旻芳揹行動不便巨型狗狗上樓 為照顧年邁愛犬延遲生育計劃
撰文：林惠珊
責任編輯：楊安莉