【利用同情心】婆婆電話哭訴無錢開飯 好心男送$500善心疑被利用 多名市民曾中招：對白一樣

繼TVB《東張西望》揭發新蒲崗一名婆婆疑利用執紙皮扮慘的方法，利用香港人的同情心騙財後，再有網民揭發一名婆婆於太子及旺角街頭，疑以喊住講電話扮慘的方式騙財！一名港男在網上發帖，指自己早前於旺角天橋底偶遇該名婆婆，於是送上500元助對方「解困」。未料，日前他再度遇到婆婆，而對方竟然仍在喊住講電話，始令他驚覺原來自己的善心疑被利用。對此，多名網民亦指曾「中招」，紛紛表示：「對白一樣！」

「呢個阿婆太子-旺角出沒。」該名港男在Facebook群組「巴打絲打 Facebook Club」發帖，指早前他在旺角天橋底，目睹該名婆婆的「慘況」，

「佢喊住同人講電話，之後佢話自己無錢食飯、無錢睇醫生，好可憐咁。」

於是，鑑於疫情嚴重，加上婆婆向他表示自己「排唔到政府街症」、「痛咗好多日」，他便送上500元予婆婆「解困」，「我覺得可疑，但我選擇相信佢，因為萬一如果佢無呃人，我就係見死不救。」當時，他甚至曾向婆婆表示：「我希望你唔係呃人，香港人肯互助唔係因為蠢。」

未料至昨日（27日），他放工時竟然再度在街頭遇上婆婆，「對白橋段全部一樣......」。驚悉疑似被騙後，他只好在帖文中苦笑道：

「有無社福界人士帶阿婆走？唔好等阿婆日日無飯食、日日無錢睇醫生咁陰公啦，佢講電話講到喉嚨痛喇喂！」

{{hket:inline-image name="wh280720205.jpg"}}{{/hket:inline-image}}

港男再次遇到婆婆喊住講電話，始驚覺疑似被騙。（「巴打絲打 Facebook Club」圖片）

此事引來網民熱議，不少人驚呼曾經「中招」或曾「心動」欲送錢幫忙，指婆婆除了在太子、旺角出沒外，也會在紅磡、西環、北角現身，「佢講500蚊先夠」、「曾經係紅磡出現多次……對白係：無錢交水電煤，條友唔肯還錢畀佢，佢就黎被cut水電煤了。一路講一路喊！同瀨了$500的人揮手區」、「上兩星期西環見到佢，一樣對白，猶豫咗幾秒幫唔幫」、「上次佢喺北角佢話跌咗政府畀佢啲錢（生果金）我畀咗$3000佢」。

對此，不少網民認為利用別人的同情心來騙財的行為可恥，建議大家如遇上疑似有需要人士，可找社署人員或警方協助，「佢咁樣好過返工添，點會無錢吖」、「分分鐘收入豐厚過好多人」、「千祈唔好畀錢，可以買個飯盒或麵包畀佢」、「畀錢會助長呢類人喎；你唔係幫佢、係害佢！」、「報警搵社署幫佢，唔好畀現錢佢」。

每朝索取《晴報》：精明生活．健康家庭．開心娛樂

責任編輯：李凱晴