53歲前亞姐葉玉卿自96年嫁畀美國富商胡兆明後息影，當時有報道指兩公婆身家逾80億，曾以5000萬港元買百年古堡，同3名仔女坐私人飛機出入。日前有美國傳媒報道，胡兆明向法庭申請個人破產，負債高達逾8億港元，葉玉卿向傳媒承認老公破產，但佢就話冇咩大問題，相信可以重建。
(胡芷欣instagram圖片)
其實唔少名人都曾經破話產，不過佢哋大多都可以捱過破產，重新出發，仲賺得多過之前㖭。
1.狄娜
佢原名梁幗馨，喺62年加入影壇，入行13年來以性感造型拍攝過多部電影，一脫成名，代表作係《七擒七縱七色狼》。70年代，狄娜棄影從商欠下巨額債務，佢一度為躲避債務返大陸，同時宣布自己破產，成為香港歷史上首位宣布破產嘅人。不過佢喺4年內還清所有債務恢復自由身，破產案亦正式完結，此舉當年轟動全港。後來佢返回內地發展航天科技，成功翻身。
(電影截圖)
(電影截圖)
2.鍾鎮濤
96年，鍾鎮濤夫婦（指前妻章小蕙）借款1.5億港幣炒買豪宅，當時嘅樓市仍處於頂峰。亞洲金融危機爆發，鍾鎮濤夫婦所購房產大幅度貶值，貸款本息滾至2.5億港幣，直到02年法院裁定鍾鎮濤破產。06年破產令解除，鍾鎮濤努力賺錢，同范姜組織幸福家庭，依家喺大陸密密搵，生活幸福快樂。
(央視截圖)
(鍾鎮濤instagram圖片)
(鍾鎮濤instagram圖片)
3.鍾家鴻
陳慧珊嘅老公兼經理人鍾家鴻喺12年入稟高院申請破產，已淡出娛樂圈嘅陳慧珊不離不棄，復出賺錢養家。佢哋依家唔止順利渡過難關，舊年兩公婆仲自資逾7位數字製作節目《放學後》，陳慧珊身兼監製同主持，邀請咗胡杏兒、宣萱、李若彤等多個嘉賓上節目做分享。
(陳慧珊微博圖片)
4. 陳百祥
阿叻陳百祥早年開過製衣廠，有報道指佢高峰時身家過千萬，擁5架名車，不過後來生意走下坡，當時製衣廠仲有百萬幾件衫，要跑到中東，賣衫畀海盜，足足4年先賣完存貨。據知當時陳百祥曾經破產，好友譚詠麟將準備買樓嘅3萬蚊首期，借咗畀陳百祥去破產管理局申請破產。後來，佢再次投資失利欠債過千萬港元，第二度破產。不過佢好快就絕地翻身，依家仲做緊馬主，坐擁6000萬物業，享受人生。佢接受傳媒訪問就話功勞全歸黃杏秀，佢話3T、四重彩全部都係黃杏秀中，買樓都可以升3倍，形容黃杏秀係仙女下凡。
5.廖偉雄
廖偉雄憑電視劇《網中人》「阿燦」令觀眾留下深刻印象，94年佢淡出娛樂圈，轉搞美容直銷同卡拉OK生意，5年後欠債40幾萬港元，被銀行入稟追討申請破產，因而再重返演藝圈一段時間。後來佢一度轉型，喺馬來西亞擔任燒味廚師，製作「燦師傅」叉燒，近年去廣東羅定市定居，專注發展有機農業。佢種嘅「亞燦米」成為咗全國十大好米之一，仲係中國華南地區唯一一個攞到國際3大認證嘅大米。
(TVB電視截圖)
(東星圖片)
撰文：張芷晴
責任編輯：黃蘊姿