《大帥哥》除了主角張衞健的演出搶眼之外，飾演軍師顧落蘆的曹永廉氣勢都不弱，多次與張衞健連番鬥嘴，好有火花，獲得網民大力讚賞，更於新劇《她。她。她的少女時代》初嘗男主角滋味。不過風光背後，其實54歲的曹永廉人生好坎坷，當年做歌手做到欠10幾萬卡數，被迫問家人攞錢，仲搞到患上情緒病，之後加入TVB，每月人工又只有幾千蚊，捱足2４年終於苦盡甘來，堪稱獅子山下的勵志故事。
問家人攞錢攞到有情緒病
曹永廉家境貧困，因父親生意失敗，於是舉家被逼搬到九龍塘木屋區居住。中五畢業之後曹永廉為養家做過很多行業，包括快餐店、清潔工人、女性胸圍銷售員、超級市場等。直到1994年，他獲賞識入行做歌手，2年間推出過3張個人專輯。不過當時做歌手收入有限，但支出驚人，出騷的服裝更要自費，為了充撐場面，曹永廉頂硬上，次次買名牌衫，結果信用卡碌爆，欠下銀行十幾萬卡數，戶口只得幾百蚊，只能一直還min pay：「當時冇收入，只靠積蓄，錢銀係好大問題，咁大個仔仲要問屋企攞錢好唔舒服。」
最終曹永廉因為壓力太大，患上情緒病。在走投無路情況下，曹永廉決定放棄歌手夢想，1998年由經理人搭路加入TVB做演員。可惜當時人氣低，就算入TVB人工亦只有幾千元，曹永廉不禁捉住經理人爆喊：「經理人話人工得幾千，我就喺電話度喊，少到好少，打工點都有1萬吖，我冇諗過咁嘅錢，同經理人一路講一路喊，但冇辦法啦！」幸而天無絕人之路，曹永廉加入TVB後拍《妙手仁心III》認識邵美琪，對方知道他欠下一身卡數，向來不靠情侶檔掘金的邵美琪，破例與曹永廉組情侶檔出騷。令曹永廉工作機會增加，終於慢慢還清債務，走出人生低谷，他更決定cut剩一張信用卡，代表重新出發的決心。
入行24年浮浮沉沉 首嘗男一滋味
其後曹永廉在TVB可謂一劇接一劇，當中的《公公出宮》、《師奶MADAM》等都獲得不俗迴響，直至最近更憑《大帥哥》中的陰濕自私軍師顧落蘆，人氣大爆發，網民大讚他無論語氣、表情都非常到位，與張衞健一來一往鬥嘴那種感覺好微妙，相信是劇中唯一一個接得住張衞健對白的人。不過曹永廉不敢獨攬功勞：「劇入面個個都咁勁，張衞健難得返嚟拍劇，無謂累咗佢呀嘛！其實我都係幫吓口講幾句啫，但佢係會加咗好多佢自己嘅元素喺入面，可以話係畫龍點睛，有好多時佢都會話返俾我聽點去做，結果做出嚟又真係幾好，尤其係我同佢第一次見面嗰場戲。」
入行24年一直飾演配角的曹永廉終於獲TVB賞識，首次在新劇《她。她。她的少女時代》一嘗男主角的滋味。其實他演技好，又有觀眾緣，到底今次能否奠定將來的男一寶座，大家就要拭目以待喇！