【小巴讓座】媽媽帶BB車上小巴欲坐最後排 乘客不忿「被迫」讓座惡言嘲諷

公共交通工具的讓座問題，一直引起不少爭議。日前有小巴乘客遇到一位抱BB上車的媽媽，對方詢問可否讓出最後排座位，方便放BB車，該乘客雖然讓座，卻出言嘲諷對方，結果引起雙方一場罵戰。

一位網民前日（14日）向Facebook專頁「生仔要考牌系列」投稿，指自己遇到一名「拎小朋友嚟做擋箭牌嘅尊貴父母」。

事主指自己當晚欲乘搭小巴回家，卻不幸「送車尾」，冒滂沱大雨在原地候車，形容經過15分鐘「企到腳都軟」，終於成功上車並坐在最後排「孖位」。惟當小巴幾乎滿座時，一位手抱嬰孩的母親上車後向他詢問：

「可唔可以讓個位呀？我有架車仔（嬰兒車）要擺呢度。」

事主聞言「真係唔係好想讓」，認為自己排最前、付足車資，有「自由揀位嘅權利」，但因「夜媽媽廢是(費事)煩」，且體諒對方攜同小孩，才讓出座位。不過，事後他卻因略感不忿，揶揄一句：

「有錢生仔，冇錢搭的士。」

對方最初未有反駁，直至他落車時才開口「反擊」：

「心地唔好，唔會有小朋友生㗎！」

事主事後大感不滿，在文中形容：

「我讓畀你係人情，唔讓畀你係道理。點解香港愈來愈多女人生完仔就覺得自己大晒？要全世界就晒你一個先？」

事主稱經過是次遭遇，日後恐怕不敢生兒育女，他解釋並非怯於該名母親的「詛咒」，而是擔心將來要與「唔講道理、打橫行」的家長打交道。

然而，不少網民看到帖文後，反而認為事主有問題，「既然你都讓咗位，做乜仲要講難聽的說話？」、「其實唔使人哋出聲都可以讓吓位，你又唔會有損失，大家互相幫助，斤斤計較個人會好辛苦」、「你大可以選擇唔好讓，讓完又要寸人，顯得你有幾咁小家」。

文章獲Facebook專頁「生仔要考牌系列」授權刊登。

每朝索取《晴報》：精明生活．健康家庭．娛樂資訊

撰文：蘇麗儀